ރައީސް ޑރ. މުހައްމަދު މުއިއްޒު ވަރަށް އަވަހަށް އިންޑިއާއަށް ވަޑައިގަންނަވާ ގޮތަށް ހަމަޖެހިފައިވާ ކަމަށް ރައީސް އޮފީހުން މިއަދު ބުނެފިއެވެ.
ރައީސް އޮފީހުގެ ތަރުޖަމާނު ހީނާ ވަލީދު ރައީސް މުއިއްޒު ވަރަށް އަވަހަށް އިންޑިއާއަށް ދަތުރުފުޅެއް ކުރައްވާ ގޮތަށް ހަމެޖެހިފައިވާ ކަމަށެވެ. އެ ދަތުރުފުޅަށް އެންމެ ރަނގަޅު ތާރީހަކީ ކޮބައި ކަމާ މެދު ދެ ގައުމުގެ ދެމެދުގައި މަޝްވަރާތައް ކުރިއަށްދާ ކަމަށް ވެސް ހީނާ ވިދާޅުވިއެވެ.
"ދައުލަތުގެ އެންމެ އިސްވެރިން އެގޮތަށް ކުރައްވާ ދަތުރުފުޅުތައް ކުރައްވަމުން ގެންދަވަނީ ދެ ގައުމަށްވެސް އެންމެ އިސްވެރިންނަށް އެންމެ ފަސޭހަ ވަގުތުފުޅުތަކުގައި،" ހީނާ ވިދާޅުވިއެވެ.
ރައީސް ޑރ. މުއިއްޒު ވެރިކަމަށް ވަޑައިގެންނެވި ފަހުން މިދިޔަ ޖޫން މަހުގެ ތެރޭގައި ވެސް އިންޑިއާ އަށް ވަޑައިގެންނެވިއެވެ. އެއީ އިންޑިއާގެ ބޮޑުވަޒީރު ނަރެންދުރަ މޯދީ ތިންވަނަ ދައުރަކަށް މަގާމުގެ ހުވާކުރެއްވުމަށް ބޭއްވި ރަސްމިއްޔާތުގައި ބައިވެރިވެވަޑައިގަތުމަށެވެ.
އެކަމަކު، މިދިޔަ ނޮވެމްބަރު 17 ގައި ވެރިކަމާ ހަވާލުވެވަޑައިގެންނެވި ފަހުން ރައީސް މުއިއްޒު އަދި އިންޑިއާއަށް ރަސްމީ ދަތުރުފުޅެއް ނުކުރައްވައެވެ.
ރާއްޖޭގައި ތިބި އިންޑިއާ ސިފައިން ބޭލުމަށް ކުރީގެ ސަރުކާރުގެ ދުވަސްވަރު ހިންގި "އިންޑިއާ އައުޓް" ކެމްޕެއިންގައި އޭރުގެ އިދިކޮޅު ލީޑަރުން އަދި މިހާރު ސަރުކާރުގެ ވެރިން ބައިވެރިވެވަޑައިގަތުމާ ގުޅިގެން ރާއްޖެ އާއި އިންޑިއާއާ ދެމެދު އޮތް ގުޅުން ވަރަށް ބޮޑަށް ހީނަރުވެގެން ދިޔައެވެ.
ރާއްޖެ އާއި އިންޑިއާއާ ދެމެދު އޮތް ގުޅުން މާ ބޮޑަށް ގޯސްވީ، މި ސަރުކާރުގެ ތިން ޑެޕިއުޓީ މިނިސްޓަރަކު އިންޑިއާއަށާއި މޯދީ އަށް ބަދު ބަސް ވިދާޅުވެ، ފުރައްސާރަ ކުރައްވައި މީސް މީޑިއާގައި އެކި ކަހަލަ ޕޯސްޓްތައް ކުރެއްވުމުންނެވެ. އެއާއެކީގައި ތިން ޑެޕިއުޓީ މިނިސްޓަރުން ވަނީ ސަސްޕެންޑްކޮށްފައެވެ.
މިއާއެކު، ރާއްޖޭގެ ޓޫރިޒަމް ބޮއިކޮޓްކޮށް، އިންޑިއާގެ ލަކްޝަދީބް ފަތުރުވެރިކަމުގެ މަންޒިލެއްގެ ގޮތުގައި އިންޑިއާގެ ބައެއް ފަރާތްތަކުން ޕްރޮމޯޓްކޮށްފައިވެއެވެ. އިންޑިއާގެ ބޮލީވުޑް އަދި ކްރިކެޓް ތަރިން ވެސް ބައިވެރިވި އެ ކެމްޕޭނަށް ފަހު، އިންޑިއާ ޓޫރިސްޓުން ރާއްޖެ އައުން ވަނީ ވަރަށް ބޮޑަށް ދަށްވެފައެވެ.
ނަމަވެސް، އޭގެ ފަހުން ރާއްޖެ އާއި އިންޑިއާގެ ގުޅުން އަނެއްކާވެސް ވަނީ ބަދަހިވާން ފަށައިފައެވެ. އެގޮތުން ރައީސް މުއިއްޒު އިންޑިއާ އަށް އެންމެ ފަހުން ކުރެއްވި ދަތުފުޅުގައި، މޯދީއާ ވެސް ބައްދަލު ކުރެއްވިއެވެ. އަދި ދާދިފަހުން ފޮރިން މިނިސްޓަރު ޒަމީރު ވެސް އިންޑިއާއަށް ރަސްމީ ދަތުރުފުޅެއް ކުރެއްވި އިރު، އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ވެސް ރަސްމީ ދަތުރެއްގައި ރާއްޖެ ވަޑައިގެންނެވިއެވެ.
