ހުޅުމާލެއިން ހަތަރުފުރޮޅުލީ އުޅަނދު ޕާކުކުރުމަށް ބިމެއް ހަމަޖައްސައިފިއެވެ.
މި ބިމަކީ ހުޅުމާލެ ސަހަރާ މިސްކިތް ކުރިމައްޗަށް އޮތް، 90،000 އަކަފޫޓުގެ ބިމެކެވެ. މީގެ ތެރެއިން 50،000 އަކަފޫޓް ޚާއްސަކޮށްފައިވަނީ ޓެކްސީތައްފަދަ ހަތަރުފުރޮޅުލީ ވެހިކަލްތަކަށެވެ. އަނެއް 40،000 އަކަފޫޓްގެ ސަރަޙައްދު ޚާއްސަކޮށްފައިވަނީ ހުޅުމާލެ މަގުތަކުގައި ޤަވައިދާ ޚިލާފަށް ޕާކްކޮށްފައި ހުންނަ ވެހިކަލްތައް ޓޯ ކުރުމަށްފަހު ގެނެސް ބެހެއްޓުމަށެވެ.
ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވެފައިވަނީ ކުރިއަށް އޮތް 2 ދުވަހުގެ ތެރޭގައި އެ ބިމުގައި ޕާކްކުރުމުގެ ފުރުޞަތު ލިބޭނެ ކަމަށެވެ. މިހާރު އަންނަނީ އެ ބިން ސާފުކޮށް، ބިންގަނޑު އެއްވަރުކުރުމުގެ މަސައްކަތްތައް ކުރަމުންނެވެ. މިނިސްޓަރު އިތުރަށް ވިދާޅުވެފައިވަނީ މި ބިމުގައި ޕާކު ކުރުމުގެ އިންތިޒާމުތައް ހަމަޖައްސަނީ ހުޅުމާލޭގައި އަޅާ ޕާކިން ބިލްޑިންގުތަކުގެ މަސައްކަތް ނިމެންދެން ކަމަށެވެ.
ވަޒީރު އިތުރަށް ވިދާޅުވެފައިވަނީ ޕާކިންގެ މައްސަލައަށް ހައްލެއް ހޯދުމަށް ކުރަމުންދާ މަސައްކަތްތަކުގެ ތެރެއިން މާލެ ސަރަހައްދުގައި ހުސްކޮށް އޮތް ބިންތަކުގައި ވަގުތީގޮތުންނަމަވެސް ޕާކްކުރެވޭނެ އިންތިޒާމް ހަމަޖެއްސުމަކީ މުހިއްމުކަމަކަށްވާތީ އެކަން ކުރުމުގެ މަސައްކަތްތައްވެސް ކުރައްވަމުންގެންދަވާ ކަމަށެވެ.
