ފަލަސްތީނުގެ ރައްޔިތުންނަށް އިޒްރޭލުން ދެމުންގެންދާ އަނިޔާތަކާ ދެކޮޅަށް އަޑުއުފުލަމުން އައި ދެ އަންހެނުން، އާއިޝަތު ޝާދިޔާ އާއި ޑރ. ޝަޒްރާ އިބްރާހިމް، ފުލުހުންގެ ބަންދުގައި ތިން ދުވަހު ބެހެއްޓުމަށް ކްރިމިނަލް ކޯޓުން އަމުރުކޮށްފައެވެ.
ފުލުހުން މަޢުލޫމާތު ދީފައިވާ ގޮތުގައި، މި ދެ އަންހެން ކަނބަލުން ހައްޔަރުކުރެވުނީ އެއްވެއުޅުމުގެ މިނިވަންކަމުގެ ޤާނޫނާ ޚިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، ވަކި ސަފީރަކަށް އުނދަގޫވާ ގޮތަށް ޢަމަލުކޮށް، އަދި ފުލުހުންގެ ވާޖިބު އަދާކުރުމަށް ހުރަސްއެޅުމުގެ ސަބަބުންނެވެ.
އާއިޝަތު ޝާދިޔާ، (47 އަހަރު) އަދި ޑރ. ޝަޒްރާ (36 އަހަރު) މި ދެ އަންހެން ކަނބަލުން ހައްޔަރުކުރުމާ ގުޅިގެން އެމްޑީޕީ އާއި އަދާލަތު ޕާޓީން ވަނީ މި ޢަމަލު ކުށްވެރިކޮށް، އެ ދެ މީހުން ވަގުތުން ދޫކޮށްލުމަށް ގޮވާލާފައެވެ.
މި ދެ އަންހެން ކަނބަލުން ވަނީ އިނގިރޭސިވިލާތުގެ އެމްބަސީ، ޖަރުމަނުގެ އެމްބަސީ، އދ. ގެ އޮފީސް އަދި އިނގިރޭސިވިލާތާއި ސައުދީ ޢަރަބިއްޔާގެ ސަފީރުން ދިރިއުޅުއްވާ ގެކޮޅުތަކުގެ ކައިރީގައި މެދުކެނޑުމެއްނެތި އިހުތިޖާޖުކޮށް އަޑުއުފުލަމުން ގެންގޮސްފައެވެ.
އެހެންނަމަވެސް، ފުލުހުންގެ ފަރާތުން އަދި ވަކިން ޚާއްޞަކޮށް ކޮން ސަފީރަކަށް ނުވަތަ ކޮން ޑިޕްލޮމެޓިކް މިޝަނަކަށް އުނދަގޫކުރީ ކަމެއް ސާފުކޮށް ބަޔާންކޮށްފައެއް ނުވެއެވެ.
