ދިވެހިރާއްޖޭގެ އީ-ކޮމާސް ދާއިރާ ކުރިއަރުވައި ހަރުދަނާކުރުމުގެ މަޤްޞަދުގައި ޕޭޕަލް ކުންފުންޏާއެކު މަޝްވަރާތަކެއް ކުރިއަށް ގެންގޮސްފައިވާ ކަމަށް އިޤްތިޞާދީ މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި މިނިސްޓަރު ސަޢީދު ހާމަކުރެއްވި ގޮތުގައި، އިޤްތިޞާދީ މިނިސްޓްރީން ވަނީ ޕޭޕަލް ކުންފުނީގެ ގްލޯބަލް މާކެޓިންގ ޑިޕާޓްމަންޓުގެ ރައީސްއާއެކު މުހިންމު މަޝްވަރާތަކެއް ބާއްވާފައެވެ. މި މަޝްވަރާތަކުގެ މައިގަނޑު މަޤްޞަދަކީ އީ-ކޮމާސްގެ ދާއިރާ ހަރުދަނާކުރުމުގައި އެ ކުންފުނީގެ އެހީތެރިކަން ހޯދުން ކަމަށް އޭނާ ފާހަގަކުރެއްވިއެވެ.
މިނިސްޓަރު ސަޢީދު އިތުރަށް ވިދާޅުވީ، މި މަސައްކަތުގެ އަމާޒަކީ ރާއްޖޭގެ އީ-ކޮމާސް ދާއިރާގައި ހުރި ގޮންޖެހުންތަކުން އަރައިގަތުމާއި، ޕޭޕަލް މެދުވެރިކޮށް ފައިސާ ދެއްކުމުގައި ހުރި ރިސްކުތައް ކުޑަކުރުން ކަމަށެވެ.
އަދި މި މަސައްކަތްތަކަކީ ރައީސް ޑރ. މުޢިއްޒުގެ އިޤްތިޞާދީ ތަޞައްވުރުގެ ބައެއްކަމަށާއި، އެހެންކަމުން މިނިސްޓްރީން މި ލަނޑުދަނޑި ޙާޞިލުކުރުމަށް ޚާއްޞަ އަހައްމިއްޔަތުކަމެއް ދޭކަމުގައިވެސް މިނިސްޓަރު ސަޢީދު ފާހަގަކުރެއްވިއެވެ.
