މިނިސްޓަރ އޮފް ފޮރިން އެފެއާޒް މޫސާ ޒަމީރު ސަޢޫދީ އަރަބިއްޔާގެ ގަވަރނަރ އައިމަން އަލް-ސަޔާރީއާ ބައްދަލުކުރައްވައިފިއެވެ.
މި ބައްދަލުކުރެއްވުން ބޭއްވުނީ ޒަމީރު ސަޢޫދީ އަރަބިއްޔާއަށް ކުރައްވާ ރަސްމީ ދަތުރުފުޅުގެ ތެރެއިން މިއަދު ކުރީކޮޅުއެވެ.
އެކްސްގައި ކުރެއްވި ޕޯސްޓެއްގައި ޒަމީރު ވިދާޅުވެފައިވަނީ، މި ބައްދަލުވުމުގައި ދިވެހިރާއްޖޭގެ އިގްތިސާދީ ހާލަތާ މެދު މަޝްވަރާކުރެއްވި ކަމަށް ވިދާޅުވި ކަމަށާއި، ފަތުރުވެރިކަމުގެ ދާއިރާއާއި ދިވެހިރާއްޖޭގައި އިންވެސްޓްކުރުމުގެ ފުރުސަތުތަކާ ބެހޭގޮތުންވެސް މަޝްވަރާކުރެއްވި ކަމަށެވެ.
މީގެ އިތުރުން، ވިޔަފާރީގެ ދާއިރާގައި ސަޢޫދީ އަރަބިއްޔާއާއެކު މަސައްކަތްކުރުމާއި ދިވެހިރާއްޖެ ދިމާވެފައިވާ ބޭރުގެ ދަރަނީގެ މައްސަލަ ހައްލުކުރުމާ ގުޅޭގޮތުންވެސް މަޝްވަރާކުރެއްވިއެވެ.
ޒަމީރު ސަޢޫދީ އަރަބިއްޔާއަށް ވަޑައިގަތީ އަންގާރަ ދުވަހު، ސަޢޫދީ ފޮރިން މިނިސްޓަރ ޕްރިންސް ފައިސަލް ބިން ފަރުހާން އަލް ސަޢޫދުގެ ދަޢުވަތަކަށެވެ. މިނިސްޓަރު ސަޢޫދީ އަރަބިއްޔާއަށް ކުރައްވަމުން ގެންދަވަނީ ފަސް ދުވަހުގެ ރަސްމީ ދަތުރުފުޅެކެވެ.
ޒަމީރު އިއްޔެ ސަޢޫދީ ފޮރިން މިނިސްޓަރާ ބައްދަލުކުރެއްވިއެވެ. މި ބައްދަލުވުމުގައި ރައީސް މުޙައްމަދު މުޢިއްޒު ސަޢޫދީ އަމީރު އަދި ބޮޑުވަޒީރު ޕްރިންސް މުޙައްމަދު ބިން ސަލްމާން ބިން ޢަބްދުލްޢަޒީޒު އަލް ސަޢޫދަށް އެޑްރެސްކޮށް ފޮނުއްވި ސިޓީއެއް އަރުވާފައިވެއެވެ.
