ކޮވިޑް-19 ގެ ދުވަސްވަރު އައި.ޖީ.އެމް.އެޗްގެ ލެބޯޓަރީގައި ޕީ.ސީ.އާރު ޓެސްޓް ހެދުމަށް ބޭނުންކުރި "ރީއެޖެންޓްސް" އާ ގުޅޭ މައްސަލައިގައި އައި.ޖީ.އެމް.އެޗްގެ ކުރީގެ 3 ވެރިއެއްގެ މައްޗަށް ދަޢުވާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ހުށަހަޅައިފިއެވެ. މި މައްސަލައިގައި އަމިއްލަ މަޞްލަޙަތު ހިމެނޭ ފަރާތަކަށް (އާރު.އެމް.އެލް.އެސް ލެބް ސަރވިސަސްއަށް) ނާޖާއިޒު މަންފާ ހޯދައިދިނުމާއި އަމިއްލައަށް ނާޖާއިޒު މަންފާ ހޯދުމުގެ ތުހުމަތު ކުރެވެއެވެ.
ދަޢުވާކޮށްދިނުމަށް އެދި ހުށަހެޅުނު ފަރާތްތަކަކީ، ކޮވިޑް-19 ގެ ދުވަސްވަރުގައި އައި.ޖީ.އެމް.އެޗްގެ އިސް މަޤާމުތަކެއް ފުރުއްވާފައިވާ ޑރ. ޢަލީ ޢަބްދުﷲ ލަޠީފު، އައި.ޖީ.އެމް.އެޗްގެ ކުރީގެ ސީ.އީ.އޯ އިބްރާހީމް ސަލީމް، އަދި އައި.ޖީ.އެމް.އެޗްގެ ލެބޯޓަރީގެ ކުރީގެ ހެޑް ޑރ. މިލްޒާ ޢަބްދުލްމުޙްސިންއެވެ. މި ތިން ފަރާތުގެ މައްޗަށް ދަޢުވާކޮށްދިނުމަށް ހުށަހަޅާފައިވަނީ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގައެވެ.
މީގެއިތުރުން، ޑރ. ޢަލީ ޢަބްދުﷲ ލަޠީފް އަދި އޭނާގެ މަސްލަޙަތު އޮންނަ އާރު.އެމް.އެލް.އެސް ލެބް ސަރވިސަސްއިން މަނީލޯންޑަރ ކޮށްފައިވާކަމަށް ތުހުމަތު ކުރެވޭތީ، އެ މައްސަލަ ވަކިން ތަޙުޤީޤުކޮށްދިނުމަށް ފުލުހުންގެ އިދާރާއަށް ފޮނުވާފައިވެއެވެ. އަދި ޑރ. ޢަލީ ޢަބްދުﷲ ލަޠީފް ޓެކުހަށް މަކަރުހަދައި އޮޅުވާލާފައިވާކަމަށް ތުހުމަތު ކުރެވޭތީ، އެ މައްސަލަ ތަޙުޤީޤުކޮށްދިނުމަށް މޯލްޑިވްސް އިންލެންޑް ރެވެނިއު އޮތޯރިޓީއަށް ފޮނުވާފައިވެއެވެ.
އަދި ޑރ. ޢަލީ ޢަބްދުﷲ ލަޠީފު އަދި ޑރ. މިލްޒާ ޢަބްދުލްމުޙްސިނާ ގުޅޭގޮތުން ފާހަގަކުރެވުނު ކަންކަން މޯލްޑިވްސް މެޑިކަލް ކައުންސިލްގެ ސަމާލުކަމަށް ގެނެސް، އެ ދެ ފަރާތާމެދު ފިޔަވަޅު އަޅަންޖެހޭނަމަ އެކަން ކުރުމަށްފަހު އެންޓި-ކޮރަޕްޝަން ކޮމިޝަނަށް އަންގަން އަންގާފައިވާކަމަށް މިއަދު އޭސީސީން އާންމުކުރި ބަޔާނުގައި ބުނެފައި ވެއެވެ.
