ހޭންޑްބޯޅަ މޯލްޑިވްސްއިން އިންތިޒާމުކޮށްގެން ބާއްވާ 8 ވަނަ އޮފީސް/ކޮމްޕެނީ ހޭންޑްބޯޅަ މުބާރާތް މިރޭ ފަށައިފިއެވެ. މުބާރާތުގެ ފުރަތަމަ މެޗުގައި ވާދަކޮށްފައިވަނީ ފިރިހެން ޑިވިޝަނުގެ އެންމެ ފަހުގެ ޗެމްޕިއަން އެމްޑަބްލިޔުއެސްސީ އާއި ރަނަރަޕް ވެމެކޯއެވެ.
މުބާރާތް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ކޮމިޝަނަރ އޮފް ސްޕޯޓްސް މުޙައްމަދު ތޮލާލެވެ. މި ރަސްމިއްޔާތުގައި ހޭންޑްބޯޅަ މޯލްޑިވްސްގެ އިސްވެރިންނާއި، މުބާރާތުގައި ވާދަކުރާ ޓީމުތަކުގެ ކުޅުންތެރިންނާއި އޮފިޝަލުން ބައިވެރިވިއެވެ.
ކުރިން މި މަހުގެ 15 ވަނަ ދުވަހު ފެށުމަށް ހަމަޖެހިފައިވީ ނަމަވެސް، މޫސުން ގޯސްވުމުގެ ސަބަބުން މުބާރާތް ފަސްކުރަން ޖެހުނެވެ. އެހެންނަމަވެސް މުބާރާތުގެ މެޗުތައް ކުރިއަށް ގެންދާނީ ކުރީގެ ޝެޑިއުލާ އެއްގޮތަށެވެ.
މި އަހަރުގެ މުބާރާތުގައި ޖުމުލަ 42 ޓީމު ބައިވެރިވެފައިވެއެވެ. މުބާރާތް ކުރިއަށްދާނީ ދެ ޑިވިޝަނަކަށް ބަހާލައިގެންނެވެ. ފުރަތަމަ ޑިވިޝަނުގައި ފިރިހެން ހަތަރު ޓީމާއި އަންހެން ހަ ޓީމު ބައިވެރިވެފައިވާއިރު، މި ޑިވިޝަނުގެ އަންހެން އަދި ފިރިހެން މެޗުތައް ވެސް ކުޅުމަށް ހަމަޖެހިފައިވަނީ ލީގު އުސޫލުންނެވެ.
ދެވަނަ ޑިވިޝަނުގައި އަންހެން 20 ޓީމާއި ފިރިހެން 12 ޓީމު ބައިވެރިވެފައިވެއެވެ. އަންހެން މެޗުތައް ފަސް ޓީމުގެ ހަތަރު ގްރޫޕަކަށް ބަހާލައިގެން ކުރިއަށް ގެންދާއިރު، ކޮންމެ ގްރޫޕަކުން އެންމެ ރަނގަޅު ނަތީޖާ ހޯދާ ދެ ޓީމު ކުއާޓަރ ފައިނަލަށް ހޮވޭނެއެވެ. ފިރިހެން މެޗުތައް ހަތަރު ޓީމުގެ ތިން ގްރޫޕަކަށް ބަހާލައިގެން ކުރިއަށްދާއިރު، ކޮންމެ ގްރޫޕަކުން އެންމެ ރަނގަޅު ނަތީޖާ ހޯދާ ދެ ޓީމުގެ އިތުރުން، ތިން ގްރޫޕުގެ ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމުވެސް ކުއާޓަރ ފައިނަލަށް ހޮވޭނެއެވެ.
މި މުބާރާތަކީ ރާއްޖޭގެ އޮފީސްތަކާއި ކުންފުނިތަކުގެ މެދުގައި ހޭންޑްބޯޅަ ކުޅުމުގެ ޝައުޤުވެރިކަން އިތުރުކޮށް، މި ކުޅިވަރު ކުރިއެރުވުމަށް ބާއްވާ މުހިންމު މުބާރާތެކެވެ.
