މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން، ތިލަދުންމަތީ އުތުރުބުރި (ހއ. އަތޮޅު) އިން ފެށިގެން ކޮޅުމަޑުލު (ތ. އަތޮޅު) އަށް ޔެލޯ އެލާޓެއް ނެރެފިއެވެ. މި އެލާޓް ދެމިއޮންނާނީ މިރޭ 20:00 އިން 24:00 އަށެވެ.
މެޓް އޮފީހުގެ އެލާޓުގައި ވާގޮތުން ވަގުތުގައި ބޯކޮށް ވާރޭވެހޭނެކަމަށް ލަފާ ކުރެވެއެވެ. އަދި ވައިގަދަވެ 25-30 މޭލަށް އަރާނެ ކަމަށާއި ކަނޑު ވަރަށް ގަދަވާނެކަމަށް ލަފާކުރެވޭކަމަށްވެސް ބުނެފައި ވެއެވެ. މީގެ ކުރިން، މިއަދު މެންދުރުފަހު 14:00 އިން 20:00 އަށްވެސް ހަމަ މި ސަރަޙައްދުތަކަށް ޔެލޯ އެލާޓެއް ނެރެފައިވެއެވެ.
ފާއިތުވި ހަފުތާގައި މޫސުން ގޯސްވުމުގެ ސަބަބުން ބުދަ ދުވަހު ސަރުކާރު އޮފީސްތައް ބަންދުކުރަން ޖެހުނެވެ. އަދި 20 ރަށަކަށް ގެއްލުން ލިބުނު އިރު، މާލޭގައި 231 ފެންބޮޑުވުމުގެ ހާދިސާ ރިޕޯޓުކުރެވުނެވެ.
މޫސުން ގޯސްވެފައިވާ މި ދަނޑިވަޅުގައި ރައްޔިތުން ސަމާލުވުމަށާއި، ކަމާބެހޭ އިދާރާތަކުން ދޭ އިރުޝާދުތަކަށް ޢަމަލުކުރުމަށް ސަރުކާރުން ވަނީ އިލްތިމާސް ކޮށްފައެވެ.
