ވިލާ ކޮލެޖުން ދިވެހިރާއްޖޭގައި ފުރަތަމަ ފަހަރަށް އިންޖިނިއަރިންގ އެގްޒިބިޝަނެއް ކާމިޔާބުކަމާއެކު ބާއްވައިފިއެވެ.
ވިލާ ކޮލެޖުގެ ހޯލުގައި 1330 އިން 1500 އަށް ބޭއްވުނު، އާންމުންނަށް ހުޅުވާލެވިފައިވާ މި އެގްޒިބިޝަންގައި ވިލާ ކޮލެޖުން ހިންގާ މެކަޓްރޯނިކްސް، މެކޭނިކަލް، އިލެކްޓްރިކަލް އަދި އިލެކްޓްރޯނިކް އިންޖިނިއަރިންގ ޑިގްރީ ޕްރޮގްރާމްތަކުގެ 40 އިންޖިނިއަރިންގ ޕްރޮޖެކްޓް ދައްކުވައިދިނެވެ.
މި ހަރަކާތް ފެށުނީ ފެކަލްޓީ އޮފް އިންޖިނިއަރިންގގެ ހެޑް އޮފް ސްކޫލް، އުދުމާ އަބްދުއްލަތީފް ދެއްވި ކުރު ތަޢާރަފަކުންނެވެ. އޭނާ މި ހަރަކާތުގެ ކުރު ތަފްސީލެއް ދެއްވައި، ކޮލެޖުގެ ދަރިވަރުން އައު އީޖާދުތަކާއެކު ކުރިއަށްދާ ގޮތް ފާހަގަކުރެއްވިއެވެ.
"މި އެގްޒިބިޝަނަކީ ހަމައެކަނި އިވެންޓެއް ނޫން. މިއީ އިލެކްޓްރިކަލް އެންޑް އިލެކްޓްރޯނިކްސް، މެކޭނިކަލް އަދި މެކަޓްރޯނިކްސް އިންޖިނިއަރިންގ ދަރިވަރުން އަހަރުތަކެއް ވަންދެން ދައްކުވައިދީފައިވާ ހިތްވަރު، ހުނަރު، އުފެއްދުންތެރިކަން އަދި ބުރަ މަސައްކަތުގެ ހެއްކެއް،" އުދުމާ ވިދާޅުވިއެވެ.
މި އެގްޒިބިޝަން އިފްތިތާޙު ކުރެއްވީ ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދެވެ.
މި މުނާސަބަތުގައި ވާހަކަދައްކަވަމުން މުޢާޒު ވިދާޅުވީ، ދުނިޔޭގެ އެކި ކަންކޮޅުތަކުގެ ޔުނިވަރސިޓީތަކުގެ ދަރިވަރުން އީޖާދީ އިންޖިނިއަރިންގ ޚިޔާލުތަކާއިގެން ކުރިއަށް އަންނަ ފަދައިން، މި ޤައުމުގެ ވެސް ބިމުގެ ސިފަތަކާ ގުޅޭ ގޮތަށް އިންޖިނިއަރިންގ ޙައްލުތަކަށް މަސައްކަތް ކުރަންވާނެ ކަމަށެވެ. އަދިމ ޔުނިވަރސިޓީތަކުގެ ދަރިވަރުންނަށް އެހީތެރިކަމެއް ބޭނުންވާނަމަ އެކަމަށް އުފަލާއެކު އެހީތެރިވާނެ ކަމަށްވެސް އޭނާ ވިދާޅުވިއެވެ.
މި އެގްޒިބިޝަންގައި އިރުގެ ހަކަތަ، އަޑުން ކޮންޓްރޯލްކުރެވޭ ކޮމްޕިއުޓަރ މެޝިންތަކާއި އެހެނިހެން އީޖާދީ މަޝްރޫޢުތައް ވެސް ހިމެނުނެވެ.
