ހޯމް މިނިސްޓްރީން ހާމަކޮށްފައިވާ ގޮތުގައި، ބިދޭސީންނާ ގުޅޭ ހުއްދަ އަދި ކޯޓާ ފީ ނުދެއްކުމުގެ ސަބަބުން ޖޫރިމަނާ އަރާފައިވާ ފަރާތްތަކުގެ އެންމެ ފުރަތަމަ އާންމުކުރި ލިސްޓުގެ ތެރެއިން މިހާތަނަށް ފައިސާ ދައްކާފައިވާ ލިސްޓެއް ހޯމް މިނިސްޓްރީން އާންމު ކޮށްފިއެވެ.
މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީއިން އާންމުކުރި އިއުލާނެއްގައި ބުނެފައިވަނީ އެއިއުލާނާއެކީ އާންމު ކޮށްފައިވާ ލިސްޓުގައި ހިމެނޭ ފަރާތްތަކަކީ އެކްސްޕެޓް ސިސްޓަމް މެދުވެރިކޮށް ފޯރުކޮށްދޭ ޚިދުމަތްތަކުގެ ފީތަކާއި ގުޅިގެން ގަވައިދުން ދައުލަތަށް ފީދައްކަމުންދާ ފަރާތްތައް ކަމުގައެވެ.
އަދި އެފަރާތްތަކުން ދައުލަަތަށް ދައްކަންޖެހޭ ފީތައް ދައްކާފައިވާކަމަށްވެސް އިއުލާނުގައި ބުނެފައި ވެއެވެ. ނަމަވެސް ފާއިތުވި ޖުލައިމަހުގެ 24 ވަނަ ދުވަހު އާންމުކުރި ލިސްޓުގައި އެފަރާތްތަކުގެ ނަން ހިމެނުނީ އެތާރީޚާއި ހަމައަށް އެފަރާތްތަކުން ދައްކަންޖެހޭ ފީތަކުގެ އަދަދު 100،000 ރުފިޔާއަށްވުރެ މަތިވުމުގެ ސަބަބުން ކަމުގައިވެސް ހޯމް މިނިސްޓްރީން ބުނެފައި ވެއެވެ.
ހޯމް މިނިސްޓްރީގެ މީގެ ކުރިން ހާމަކޮށްފައިވާ ގޮތުގައި، ހާހަކަށްވުރެ ގިނަ ކުންފުނިތަކުން ދައުލަތަށް ދައްކަންޖެހޭ ފައިސާގެ ޖުމްލަ އަދަދު ބައި ބިލިއަން ރުފިޔާއަށްވުރެ އިތުރުވެއެވެ. މީގެ ތެރޭގައި ހިމެނެނީ 1,026 ކުންފުންޏެވެ. އޭގެ ތެރޭގައި ބޮޑެތި، މަޝްހޫރު ކުންފުނިތައްވެސް ހިމެނެއެވެ. އޭގެ ތެރޭގައި ބޮޑެތި އަދަދުތަކުން ދައުލަތަށް ފައިސާ ދަންކަން ޖެހިފައިވާ ތިރީގައިމިވާ ކުންފުނިތައްވެސް ހިމެނެއެވެ:
– ފުޓްސަން އިންޓަނޭޝަނަލް ޕްރައިވެޓް ލިމިޓެޑް: 26.8 މިލިއަން ރުފިޔާ
– އެޑްވާންސް ގޯ ކޮންސްޓްރަކްޝަން: 14.8 މިލިއަން ރުފިޔާ
– ބްރައުން ބިލްޑާސް: 14.5 މިލިއަން ރުފިޔާ
– ހޮޓެލްސް އެންޑް ރިސޯޓް ކޮންސްޓްރަކްޝަން: 11.2 މިލިއަން ރުފިޔާ
ލިސްޓުގައި ހިމެނޭ ހުރިހާ ކުންފުނިތަކުން ޖުމްލަ 636.5 މިލިއަން ރުފިޔާ ދައުލަތަށް ދައްކަން ޖެހިފައިވާކަން ފާހަގަކުރެވެއެވެ. މިއީ ސަރުކާރުން މިފަދަ މަޢުލޫމާތު އާންމުކުރި ފުރަތަމަ ފަހަރެވެ.
ލިސްޓު އާންމުކުރުމަށްފަހު، ބިދޭސީން ގެނެސް ވަޒީފާދޭ ފަރާތްތަކުން ދައުލަތަށް ދައްކަންޖެހޭ ފައިސާގެ ތެރެއިން 182,954,572 ރުފިޔާ މިހާތަނަށް ހޯދިފައިވާކަމަށް ހޯމް މިނިސްޓްރީން ބުނެފައިވެއެވެ.
