ރާއްޖޭގެ އެކި ކަންކޮޅުތަކަށް ކުރަމުންދާ ގަދަ ވިއްސާރައާ ގުޅިގެން، ގެއްލުން ލިބޭ ފަރާތްތަކަށް އެހީތެރިކަން ފޯރުކޮށްދިނުމަށް ސަރުކާރުން އިސްކަންދޭނެކަމުގެ ޔަޤީންކަން ރައީސް މުއިއްޒު އަރުވައިފިއެވެ.
މިހާރު ރާއްޖޭ އެކި ރަށްތަކަށް ކުރަމުންދާ ވިއްސާރާއާއި ގުޅިގެން ރައީސް ކުރެެއްވި އެކްސް ޕޯސްޓެއްގައި، މިފަދަ ގަދަ ވިއްސާރައިގައި އާންމު ދިރިއުޅުމަށާއި ގެދޮރާއި މުދަލަށް ލިބޭ ގެއްލުން ކުޑަކުރުމަށް ކުރަންޖެހޭ މުހިންމު މަސައްކަތްތައް ހުރިހާ ފަރާތްތަކެއްގެ އެއްބާރުލުމާއެކު ކުރެވި، ނަތީޖާ ނެރެވޭނެކަން ފާހަގަކޮށްފައިވެއެވެ.
އަދި މާލޭގެ މަގުތައް ރަނގަޅު ފެންވަރަކަށް ހެދުމަށް ފަށާފައިވާ މަޝްރޫޢުގެ މައިގަނޑު އެއް އަމާޒަކީ މާލޭގައި ފެން ބޮޑުވުމުގެ މައްސަލަ ޙައްލުކުރުން ކަމަށް ވިދާޅުވަމުން ރައީސް ވިދާޅުވީ މި މަޝްރޫޢު ނިމުމާއެކު، މާލޭގައި ޒަމާނުއްސުރެ ދިމާވަމުން އަންނަ ފެންބޮޑުވުމުގެ މައްސަލައަށް ދާއިމީ ޙައްލެއް ލިބިގެންދާނެ ކަމަށް ސަރުކާރުން އުންމީދުކުރާކަމުގައެވެ.
މީގެއިތުރުން، ރާއްޖޭގެ އެހެން ރަށްތަކުގައިވެސް މަގުހެދުމުގެ މަޝްރޫޢުތައް ކޮންމެ އަހަރަކު ޕްލޭންކޮށްފައިވާ ގޮތަށް އިސްކަންދީގެން ކުރިއަށް ގެންދިއުމުން، އެ ރަށްރަށުގައިވެސް ފެންބޮޑުވުމުގެ މައްސަލައަށް ޙައްލު ލިބިގެންދާނެކަމަށް ރައީސްގެ އެކްސް ޕޯސްޓުގައި ފާހަގަކޮށްފައިވެއެވެ.
ކޮމެންޓު ފޮނުވާ