ނިމިދިޔަ ސަރުކާރުން ގޯތި ދޭނެކަމަށް ބުނެ ލިޔުން ދިނުމަށްފަހު ގޯތި ނުދެވުނު މައްސަލަ ފޮރުވުމަށް އިދިކޮޅު އެމްޑީޕީން މިހާރު މަސައްކަތްކުރަމުންދާ ކަމުގައި ޕީޕަލްސް ނެޝަނަލް ކޮންގްރެސް (ޕީއެންސީ)ގެ ޕާލިމެންޓަރީ ގުރޫޕުން ބުނެފިއެވެ.
މަޖިލީހުގެ އިދާރާގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާޙު ވިދާޅުވީ، ކުރީގެ ސަރުކާރުން ގޯއްޗާއި ފުލެޓު ދޭނެކަމަށް ބުނެ ނެރުނީ ހަމައެކަނި ލިސްޓެއް ކަމަށާއި، އެ ސަރުކާރު ނިމުނުއިރުވެސް ގޯތި ދިނުމަށް ބިމެއް ނުހިއްކާ ކަމަށެވެ. އަދި ގޯތި ދިނުމުގައި ކުރީގެ ސަރުކާރުން ޢަމަލުކޮށްފައިވަނީ ޒިންމާދާރުކަން ކުޑަ ގޮތަކަށް ކަމަށާއި، އެއީ ރައްޔިތުންނަށް ވެފައިވާ ޚިޔާނާތެއް ކަމަށް ފަލާޙު ވިދާޅުވިއެވެ.
ލިސްޓެއް ހަދާފައި މިދިޔަ ސަރުކާރުން ދިން ގޯއްޗާއި ފުލެޓުތައް ހަދަން އަދިވެސް އެބަ އަރާ 5.4 ބިލިޔަން ރުފިޔާ. އަދި ގޯއްޗާއި ފުލެޓު ލިބޭ މީހުންގެ ލިސްޓު ނެރުނު އިރު، އެ ލިސްޓުގައި އެބަހުރި ކޮރަޕްޝަނަށް ތުހުމަތުކުރެވޭ އެތައް ކަމެއް. ޙައްޤު ނޫން މީހުންނަށް ގޯތިދީފައިވާކަން އޭސީސީން ފާހަގަކުރޭ.
ފަލާޙު ވިދާޅުވިއެވެ.
ޕީއެންސީ ޕާލިމެންޓަރީ ގްރޫޕްގެ ސީނިއަރ ޑެޕިއުޓީ ލީޑަރު އިބްރާހިމް ޝުޖާޢު ވިދާޅުވީ، ޕީޕީއެމްގެ ސަރުކާރުގައި ރައްޔިތުންނަށް ފުލެޓު ހަވާލުކުރީ ހުޅުމާލޭގެ ދެވަނަ ފިޔަވަހި ހިއްކާ، އެތަނުގައި ފުލެޓު އަޅައި، އަސާސީ ޚިދުމަތްތައް ޤާއިމުކުރުމަށްފަހު ކަމަށެވެ. އެހެންނަމަވެސް އެމްޑީޕީގެ ސަރުކާރުން ގޯތި ދޭނެކަމަށް ބުނެ ލިސްޓް ނެރުނީ ބިންވެސް ނުހިއްކާ ކަމަށް ޝުޖާޢު ފާހަގަކުރެއްވިއެވެ.
އެމްޑީޕީގެ ސަރުކާރުން ނެރުނު ގޯއްޗާއި ފުލެޓު ލިބޭ މީހުންގެ ލިސްޓުގައި އެތައް މައްސަލައެއް ހުރިކަން އެންޓި-ކޮރަޕްޝަން ކޮމިޝަނުން ފާހަގަކޮށްފައިވާ ކަމަށް ޝުޖާޢު ވިދާޅުވިއެވެ. އެގޮތުން، ލިސްޓުގައި ހިމެނޭ 60 އިންސައްތައަށްވުރެ ގިނަ މީހުންނަށް ގޯތި ދީފައިވަނީ އެމްޑީޕީގެ މެންބަރުންނަށް ނުވަތަ އެ ޕާޓީއަށް ތާއީދުކުރާ ފަރާތްތަކަށް ކަމަށް ޝުޖާޢު ތުހުމަތުކުރެއްވިއެވެ.
މީގެއިތުރުން، ރައްޔިތުންގެ މަޖިލީހުގެ ޖަލްސާއެއްގައި ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަލީ ހައިދަރު ވެސް ވަނީ އެމްޑީޕީގެ ސަރުކާރުން ގޯތި ދޭނެކަމަށް ބުނެ ލިޔުން ހަވާލުކުރީ ނުހިއްކާ އޮތް ކަނޑަކުންކަން ފާހަގަކުރައްވާފައިވާ އެއީ ހެދިފައިވާ ގާނޫނުތަކާއި ގަވައިދުތަކާ ޚިލާފަށް ކޮށްފައި އޮތްކަމެއްކަމަށް ވިދާޅުވެފައެވެ.
