ކުރިން ފެނަކައާ ހަވާލުކޮށްފައިވާ ފެނާއި ނަރުދަމާގެ 20 މަޝްރޫޢުގެ އެއްބަސްވުން ބާޠިލުކޮށް، އެމަޝްރޫއުތައް އެމްޑަބްލިއުއެސްސީއާ ހަވާލުކޮށްފައިވާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
މަޖިލީހުގައި ކުރެވުނު ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ، ފެނަކައިން ރާއްޖޭގެ އެކި ކަންކޮޅުތަކުގައި ކުރިއަށްގެންދިޔަ ފެނާއި ނަރުދަމާގެ މަޝްރޫޢުތައް އެއް ޕެކޭޖެއްގެ ގޮތުގައި އެމްޑަބްލިއުއެސްސީއާ ހަވާލުކުރެވިފައިވާ ކަމަށެވެ. މި 20 މަޝްރޫޢު 720 ދުވަހުގެ ތެރޭގައި ނިންމުމަށް ހަވާލުކުރެވޭއިރު، ޖުމުލަ އަގު 1 ބިލިއަން ރުފިޔާއަށް އަރާ ކަމަށް މިނިސްޓަރު ފާހަގަކުރެއްވިއެވެ. ޓެންޑަރ ބޯޑުން ނިންމުމާއެކު އެއްބަސްވުމުގައި ސޮއިކުރެވޭނެ ކަމަށްވެސް މުއްތަލިބު ވިދާޅުވިއެވެ.
ކުރީގެ ސަރުކާރުން 23 ރަށެއްގައި ފެނާއި ނަރުދަމާގެ މަސައްކަތް ކުރުމަށް ފެނަކައާ ހަވާލުކޮށްފައިވެއެވެ. މީގެ ތެރޭގައި ހިމެނެނީ ސާފު ބޯފެނުގެ 16 މަޝްރޫޢުއާއި ނަރުދަމާގެ 5 މަޝްރޫޢެވެ. މި މަޝްރޫޢުތަކުގެ ޖުމުލަ އަގު 600 މިލިއަން ރުފިޔާއަށްވުރެ މަތިވެއެވެ. މީގެ އިތުރުން، 11 ރަށެއްގައި އައިސް ޕްލާންޓް ގާއިމުކުރުމުގެ މަސައްކަތްވެސް ފެނަކައާ ހަވާލުކުރެވިފައިވެއެވެ.
ފެނަކައިން ނިންމާފައިވަނީ އެ ކުންފުނިން ހިންގަމުންދިޔަ މަޝްރޫޢުތައް ކަމާގުޅޭ ދާއިރާތަކާ ހަވާލުކުރުމަށެވެ. މިގޮތުން، އައިސްޕްލާންޓްތައް އިމާރާތްކުރުމާއި ހިންގުން އެ ކުންފުނިން ހުއްޓާލާފައިވެއެވެ. ފެނަކައިން ބުނާ ގޮތުގައި، އައިސްޕްލާންޓްތައް ހިންގުމުން އެކަނިވެސް އަހަރަކު 12 މިލިއަން ރުފިޔާގެ ގެއްލުން ވަމުންދިޔައެވެ.
