ކުރީގެ ފިނޭންސް މިނިސްޓަރު އަދި ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލުނު ކޮރަޕްޝަން މައްސަލައެއް އަލުން ބެލުމަށް ޕްރޮސެކިއުޓަރ ޖެނެރަލްގެ އޮފީހުން ހައިކޯޓުގައި އިސްތިއުނާފު ކޮށްފިއެވެ. މި މައްސަލައަކީ ކ. ފުށިދިއްގަރުފަޅު ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްޤީކުރުމުގެ މަޝްރޫޢާ ގުޅޭ މައްސަލައެކެވެ.
ކުރިމިނަލް ކޯޓުން ކުރިން ނިންމާފައިވަނީ މި މައްސަލަ ކުރިއަށް ނުގެންދެވޭނެ ކަމަށެވެ. ނަމަވެސް ޕީޖީ އޮފީހުން ބުނެފައިވަނީ ކުރިމިނަލް ކޯޓުގެ ނިންމުމުގައި ޤާނޫނީ އަސާސެއް ނެތް ކަމަށާއި، ނިންމުމަށް ވާސިލުވި ސަބަބު އެކަށީގެންވާ މިންވަރަށް ބަޔާންކޮށްފައި ނުވާ ކަމަށެވެ.
މި މައްސަލައިގައި ތުހުމަތު ކުރެވެނީ ޖިހާދު، ވަޒީރުންގެ މަޖިލީހުގެ ނިންމުމާ ޚިލާފަށް އަމަލުކުރެއްވި ކަމަށެވެ. ވަޒީރުންގެ މަޖިލީހުން ނިންމާފައިވަނީ ސަރުކާރުގެ 50 ޕަސެންޓު ހިއްސާވާ ގޮތަށް ޖޮއިންޓް ވެންޗަރ އެއްބަސްވުމެއް ހެދުމަށެވެ. ނަމަވެސް ޖިހާދު ސޮއިކުރެއްވީ ދައުލަތުގެ 25 ޕަސެންޓު ހިއްސާ އޮންނަ ގޮތަށް ކަމަށް ބުނެވެއެވެ.
މި އަމަލުގެ ސަބަބުން ދައުލަތަށް ލިބުނު ގެއްލުމުގެ ތެރޭގައި ބިމު ކުލީގެ ގޮތުގައި 604 މިލިއަނަށްވުރެ ގިނަ ޑޮލަރު އުނިވެފައިވާ ކަމަށް ޕީޖީ އޮފީހުން ބުނެއެވެ. މީގެ އިތުރުން، ކުންފުނީގެ ވިޔަފާރި ފައިދާއިން ލިބޭނެ އާމްދަނީއަށްވެސް އަސަރުކުރާނެ ކަމަށް ފާހަގަކޮށްފައިވެއެވެ.
ޕީޖީ އޮފީހުން ހައިކޯޓުގައި އެދިފައިވަނީ މި މައްސަލައަކީ އަލުން ބަލަންޖެހޭ މައްސަލައެއްގެ ގޮތުގައި ކަނޑައަޅައި، ކުރިމިނަލް ކޯޓަށް އަނބުރާ ފޮނުވައިދިނުމަށެވެ.
ކޮމެންޓު ފޮނުވާ