62 މީހުންނާއެކު ދަތުރު ކުރަމުންދިޔަ މަތިންދާ ބޯޓެއް ވެއްޓިއްޖެއެވެ.
ބްރެޒިލްގެ ރައީސް ލުއިޒް އިނާސިއޯ ލޫލާ ދަ ސިލްވާ ވިދާޅުވި ގޮތުގައި ބްރެޒިލްގައި މަތިންދާބޯޓެއް ވެއްޓި ހާދިސާއެއްގައި 62 މީހުން މަރުވެފައިވާ ކަމުގައެވެ.
"އަޅުގަނޑު ވަރަށް ހިތާމަވެރި ޚަބަރެއް ދޭން މިޖެހެނީ، އަދި އަޅުގަނޑު އެދެން ހުރިހާ ބޭފުޅުން ތެދުވެވަޑައިގަތުމަށް، އެއީ އަޅުގަނޑުމެން އެއް މިނެޓުގެ ހަނުހިމޭނުކަމެއް ބޭއްވުމަށްޓަކައި. ސަބަބަކީ ދެންމެ ސާއޯ ޕައުލޯގެ ވިންހެދޯ ސިޓީގައި 58 ފަސިންޖަރުންނާއި 4 އެއަރ ކްރޫ މެންބަރުން ތިބި މަތިންދާބޯޓެއް ވެއްޓި، އަދި ހީވަނީ އެންމެން މަރުވެފައިވާ ކަމަށް. އަޅުގަނޑު އެދެން މަރުވެފައިވާ މީހުންނަށްޓަކައި އެއް މިނެޓުގެ ހަނުހިމޭންކަމެއް ބޭއްވުމަށް،" ރައީސް ލޫލާ އެކްސް (ކުރީގެ ޓްވިޓަރ) ގައި ވިދާޅުވިއެވެ.
ހުކުރު ދުވަހުގެ މެންދުރުފަހު ސޯޝަލް މީޑިއާގައި އާންމުވި ވީޑިއޯތަކުން ދައްކައިދެނީ ސާއޯ ޕައުލޯ ބޭރުގެ ރަށްވެހި ސަރަޙައްދެއްގައި ކުޑަ މަތިންދާބޯޓެއް ވެއްޓުނު މަންޒަރެވެ. ސީ.އެން.އެން ބްރެޒިލްއިން ރިޕޯޓުކުރި ގޮތުގައި، ބްރެޒިލްގެ ސިވިލް ޑިފެންސްއިން ބުނެފައިވަނީ މަތިންދާބޯޓު ވެއްޓިފައިވަނީ ގެތަކުގެ މައްޗަށް ކަމަށެވެ.
ވޯޕާސް އެއަރލައިންއިން ނެރުނު ބަޔާނެއްގައި ބުނެފައިވާ ގޮތުން، މި ފްލައިޓްގައި އެ ވަގުތު ތިބީ 58 ފަސިންޖަރުންނާއި 4 އެއަރ ކްރޫ މެންބަރުންނެވެ.
ފްލައިޓްރާޑާ24 ގެ މަޢުލޫމާތު ދައްކާ ގޮތުގައި، ވޯޕާސް މަތިންދާބޯޓު ކަސްކަވެލްއިން ފުރައިގެން ސާއޯ ޕައުލޯއަށް ދަތުރުކުރަމުން ދަނިކޮށް، މެންދުރުފަހު 1:30 ގެ ކުރިން ކުއްލިއަކަށް ސިގްނަލް ގެއްލިފައިވެއެވެ.
