ފެނަކަ ކޯޕަރޭޝަނުން މުވައްޒަފުން ތަމްރީނުކޮށް ޚިދުމަތްތައް ދިރާސާކުރުމަށްޓަކައި ވިލާ ކޮލެޖާއެކު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ މުޢާޒް މުޙައްމަދު ރަޝީދެވެ. ވިލާ ކޮލެޖުގެ ފަރާތުން ސޮއިކުރެއްވީ އެ ކޮލެޖުގެ ވައިސް ރެކްޓަރ ޑރ. ޢަލީ ނަޖީބެވެ.
މި އެއްބަސްވުމުގެ ދަށުން، ގުޅުންހުރި ދާއިރާތަކުން ކުންފުނީގެ މުވައްޒަފުންނަށް އެކި ބާވަތުގެ ތަމްރީނު ޕްރޮގްރާމްތައް ހިންގުމަށް ވަނީ ހަމަޖެހިފައެވެ. ޚާއްޞަކޮށް ޓެކްނިކަލް މުވައްޒަފުން ޔޫޓިލިޓީ ރެގިއުލޭޓަރީ އޮތޯރިޓީ (ޔޫއާރްއޭ) ގެ މިންގަނޑުތަކަށް ތަމްރީނުކޮށް، އެކަމުގެ ސެޓްފިކެޓް ދިނުމަށްވެސް ވަނީ ރޭވިފައެވެ.
ފެނަކައިން މަޢުލޫމާތު ދިން ގޮތުގައި، ވިލާ ކޮލެޖާއެކު ޤާއިމްކުރެވުނު މި އެއްބަސްވުމުގެ ދަށުން ފެނަކައިގެ ޚިދުމަތްތަކާ ގުޅޭ ދިރާސާތައްވެސް ކުރެވޭނެއެވެ. މީގެ މަޤްޞަދަކީ މިހާރު ފެނަކައިން ޚިދުމަތް ފޯރުކޮށްދޭ ގޮތްތަކާއި، އެ ޚިދުމަތްތަކާމެދު އާންމުންގެ ޚިޔާލު ހޯދުމެވެ. އަދި ރައްޔިތުން އެދޭފަދަ ފެންވަރު ރަނގަޅު ޚިދުމަތެއް ދިނުމަށް ބޭނުންވާ މަޢުލޫމާތު އެއްކުރުން ކަމަށްވެސް ބުނެފައިވެއެވެ.
