ސަރުކާރުގެ ތަރައްޤީގެ ތަޞައްވުރަކީ އިޤްތިޞާދީ އަދި ކާބޯތަކެތީގެ ރައްކާތެރިކަން ކަށަވަރުކުރާ އިޤްތިޞާދެއް އުފެއްދުން ކަމުގައި އިޤްތިޞާދީ މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު މިގޮތަށް ވިދާޅުވީ "މޯލްޑިވްސް-ސިޗުއާން (ޗައިނާ) ޓްރޭޑް އެންޑް އިންވެސްޓްމަންޓް ކޯޕަރޭޝަން ކޮންފަރެންސް" ގައި ވާހަކަފުޅު ދައްކަވަމުންނެވެ. މި ކޮންފަރެންސް އިންތިޒާމުކޮށްފައިވަނީ އިޤްތިޞާދީ ވުޒާރާއިން ޗައިނާގެ ސިޗުއާން ޕްރޮވިންސްގެ އިދާރާތަކާ ގުޅިގެންނެވެ.
މިނިސްޓަރު ސަޢީދު ވިދާޅުވި ގޮތުގައި ސަރުކާރުން ވަނީ އަސާސީ އިންފްރާސްޓްރަކްޗަރ ތަރައްޤީކުރުމަށް އިސްކަންދީފައެވެ. މީގެ ތެރޭގައި އެއަރޕޯޓު އިޤްތިޞާދީ ސަރަޙައްދު، މައި ބަނދަރު އަދި ދަނޑުވެރިކަމުގެ އިޤްތިޞާދީ ސަރަޙައްދު ހިމެނެއެވެ. އަދި ދިވެހިރާއްޖެ ބައިނަލްއަޤްވާމީ ބަންކަރިންގ ހަބަކަށް އަދި މާލީ ޚިދުމަތްތަކުގެ މަރުކަޒަކަށް ހެދުމަށް މަސައްކަތްކުރަމުންދާ ކަމަށްވެސް އެމަނިކުފާނު ވިދާޅުވިއެވެ.
މީގެއިތުރުން، މިނިސްޓަރު ފާހަގަކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޗައިނާ ދަތުރުފުޅުގައި ސޮއިކުރެވުނު 20 އެމްއޯޔޫގެ މަސައްކަތްތައް ކުރިއަށްދާ ކަމަށެވެ. އަދި ޗައިނާ-މޯލްޑިވްސް ފްރީ ޓްރޭޑް އެގްރީމަންޓް (އެފްޓީއޭ) އެކްޓިވޭޓްކުރުމަށް މަސައްކަތްކުރަމުންދާ ކަމަށާއި، ދެ ޤައުމުގެ ދެމެދުގައި ލޯކަލް ކަރަންސީ ސެޓްލްމަންޓްގެ ނިޒާމެއް ޤާއިމުކުރުމަށް މަޝްވަރާތައް ކުރިއަށްދާ ކަމަށްވެސް ވިދާޅުވިއެވެ.
މިނިސްޓަރު ސަޢީދު ވިދާޅުވީ މި ފިޔަވަޅުތަކަކީ ދިވެހިރާއްޖެއާއި ޗައިނާއާ ދެމެދު އޮތް ވިޔަފާރީގެ ގުޅުން އިތުރަށް ފުޅާކުރުމަށް މަގުފަހިކޮށްދޭނެ ކަންކަން ކަމުގައެވެ.
