އައްޑޫ ސިޓީގެ ކަރަންޓު މައްސަލަ ހައްލުކުރުމަށް 1600 ކިލޯވޮޓުގެ ޖެނެރޭޓަރެއް އެ ސިޓީއަށް ފޮނުވުމުގެ މަސައްކަތް ފެނަކަ ކޯޕަރޭޝަނުން މިހާރު ކުރަމުންދާ ކަމަށް އެ ކުންފުނިން ބުނެފިއެވެ.
މި ޚަބަރު ފެނަކައިން ހިއްސާކޮށްފައިވަނީ އެކްސް (ކުރީގެ ޓްވިޓަރ) މެދުވެރިކޮށް ކުރި ޕޯސްޓެއްގައެވެ.
ފެނަކައިގެ މެނޭޖިން ޑިރެކްޓަރ މުއާޒް މުހައްމަދު ރަޝީދު ކުރިން ވިދާޅުވެފައިވަނީ، އައްޑޫ ސިޓީގެ ހިތަދޫއަށް ކަރަންޓު ދިނުމުގެ މަސައްކަތް ކުރަމުންދަނީ ވަރަށް ގިނަ ދަތިތަކާއެކު ކަމަށެވެ. އަދި އެ ސިޓީގެ ކަރަންޓުގެ ހާލަތު ރަނގަޅު ކުރުމަށް ފެނަކައިގެ މެނޭޖްމަންޓުން ގިނަ މަސައްކަތްތަކެއް ކުރަމުންދާ ކަމަށްވެސް އޭނާ ވިދާޅުވިއެވެ.
ފެނަކައިން ދޭ މަޢުލޫމާތުގައި، ކުރީގައި ޖެނެރޭޓަރުތައް ބެލެހެއްޓުމުގެ މަސައްކަތް ނުކުރެވި ގިނަ ދުވަސްވުމުގެ ސަބަބުން އެ ތަކެތި މިހާރު ވަނީ ހަލާކުވެފައި ކަމަށް ބުނެއެވެ. މިހާރު އައްޑޫ ސިޓީއަށް ކަރަންޓު ފޯރުކޮށްދެނީ 18 ވަރަކަށް ޖެނެރޭޓަރު ބޭނުންކޮށްގެން ކަމަށްވެސް އެ ކުންފުނިން ބުނެއެވެ.
އައްޑޫ ސިޓީގެ ގުޅިފައިވާ ރަށްތަކުގައި ދިރިއުޅޭ ރައްޔިތުންގެ އަސާސީ ދިރިއުޅުމަށް ދަތިވާ މިންވަރަށް ކަރަންޓު ކެނޑެމުންދާތީ، މީގެ ހަފްތާއެއްހާ ދުވަސް ކުރިން އިދިކޮޅު އެމްޑީޕީން ވަނީ މަޖިލީހަށް ކުއްލި މައްސަލައެއް ހުށަހަޅާފައެވެ. މި މައްސަލައަށް އަވަސް ހައްލެއް ހޯދުމަށް ގިނަ ފަރާތްތަކުން ގޮވާލަމުންދެއެވެ.
ކޮމެންޓު ފޮނުވާ