ސައުދީ އަރަބިއާގައި ހިނގަމުންދާ އިސްލާމީ ކަންތައްތަކާބެހޭ މިނިސްޓަރުންގެ ކޮންފަރެންސްގައި ބައިވެރިވެވަޑައިގަންނަވާ ރާއްޖޭގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު، ފަލަސްތީނުގެ އިސްލާމިކް މިނިސްޓަރު ޑރ. މުހައްމަދު މުސްތަފާ ނަޖުމުއާއަށް ރާއްޖޭގައި ހުތުބާ ދެއްވުމުގެ ދަޢުވަތު އަރުވައިފިއެވެ.
މި ދަޢުވަތު އެރުވީ ކޮންފަރެންސްގެ ތެރެއިން ދެ މިނިސްޓަރުން ބައްދަލުކުރެއްވުމަށްފަހުގައެވެ. މައްކާގައި ބޭއްވޭ މި ކޮންފަރެންސްގެ ފަސްވަނަ ސެޝަނުގައި ޑރ. ޝަހީމް ރިޔާސަތު ބެލެހެއްޓެވިއެވެ. ކޮންފަރެންސް ނިމޭނެކަމަށް ބެލެވެނީ މިއަދުގެ ވަގުތެއްގައެވެ.
ރާއްޖޭގެ ވަފުދުގައި ޑރ. ޝަހީމްގެ އިތުރުން އިސްލާމީ މަރުކަޒުގެ އިސް އިމާމު މުހައްމަދު ލަތީފާއި، އިސްލާމިކް މިނިސްޓްރީގެ ސީނިއަރ ޕޮލިޓިކަލް ޑިރެކްޓަރު އައްޝައިޚް އިމްތިޠާއު އައްބާސް ހިމެނިވަޑައިގަންނަވައެވެ.
