އިސްލާމީ މަރުކަޒުގައި، އަދާލަތު ޕާޓީގެ އިލްމުވެރީންގެ މަޖިލީހުގެ ނާއިބު ރައީސް ދީނީ އިލްމުވެރިޔާ ޑރ. މުހައްމަދު އިޔާޒް އަބްދުލްލަތީފް ކުރިޔަށް ގެންދަމުންއައި ތަފްސީލު ކުލާސްތައް ހުއްތުމަކަށް އައިސްވާ ގޮތާއި ގުޅޭގޮތުން އިސްލާމިކް މިނިސްޓަރ ޑރ. ޝަހީމް ފަތުރަމުން ދަނީ ދޮގު މައުލޫމާތުކަަމަށް ވިދާޅުވެ، ޑރ. ޝަހީމް ތައުބާ ފުމަށް ޑރ. އިޔާޒު ގިވާލައްިވައިފިއެވެ.
"ޚަބަރު އޮންލައިން"އާއި މައުލޫމާތު ހިއްސާ ކުރައްވަމުން ޑރ. އިޔާޒު އިއްޔެ ވިދާޅުވީ އިސްލާމީ މަރުކަޒުގައާއި އަދި ސަލްމާން މިސްކިތުގައި ކުރިއަށް ގެންދަވާ ތަފްސީރު ކުލާސްތައް ހުއްޓާލާ އެހެން މިސްކިތްތަކަށް ކްލާސްތައް ބަދަލުކުރުމަށް އިސްލާމިކް މިނިސްޓްރީން އޭނާއަށް އަންގާފައިވާ ކަމުގައެވެ.
އެހެންނަމަވެސް އެކަން ދޮގުކޮށް ޑރ. ޝަހީމް މިއަދު ކުރެއްވި އެކްސް ޕޯސްޓެއްގައި ވިދާޅުވީ ބަލިވެގެން ކަމަށް ވިދާޅުވެ ޑރ. އިޔާޒް ދަރުސް ހުއްޓާލީ އަމިއްލަފުޅަށް ކަމަށާއި، ދަރުސް ކުރިޔަށް ނުގެންދަވާތާ 1 މަސްވެގެން ހިގައްޖެ ކަމުގައެވެ. އަދި ކުރީ ސަރުކާރުގެ ދުވަސްވަރުން ފެށިގެން ދެމުން އަންނަ ދަރުސެއް ހުއްޓުވާފަ ނުވާނެކަމަށްވެސް ޝަހީމް ވިދާޅުވެފައި ވެއެވެ.
ޝަހީމްގެ އެކްސް ޕޯސްޓަށް ރައްދު ދެމުން އިޔާޒް މިއަދު ކުރެއްވި އެކްސް ޕޯސްޓެއްގައި ވިދާޅުވީ ޙަޤީޤަތް އޮޅޭގޮތަށް ޑރ. ޝަހީމް ދޮގު ޚަބަރު ފަތުރައްވަމުންދާތީ ކަން ހިނގިގޮތް ސާފުކޮށްދޭނެ އޭނާ ބޭނުންވާ ކަމުގައެވެ.
އެގޮތުން 2018 އިން ފެށިގެން ކޮންމެ އާދީއްތަ ދުވަހެއްގެ ރޭ މަޣްރިބް ނަމާދުގެ ފަހުން އިސްލާމީ މަރްކަޒުގައި އޭނާ ނަގައިދެމުން އައި ޤުރްއާން ތަފްސީރު ކުލާސް މަސްދުވަހަށް މެދުކަނޑާލީ އޭނާ ދަރިފުޅަކު ބަލިވެގެން ރާއްޖެއިން ބޭރަށް ދާންޖެހިގެންކަމަށް ޑރ. އިޔާޒު ވިދާޅުވިއެވެ. އަދި ފުރުމުގެ ކުރިން މިނިސްޓްރީ ކަމާއި ބެހޭ މުވައްޒަފަށް އެކަން އަންގާ، އެނބުރި މާލެ އައިސް އެމުވައްޒަފަށް އެކަން އެންގިކަމަށް ވިދާޅުވެ، އޭގެ ފަހުން (3/8/2024) ވަަނަ ދުވަހުގެ 14:16 ގައި އެމުވައްޒަފު އޭނާއަށް ގުޅީކަމުގައި އިޔާޒް ވިދާޅުވެފައި ވެއެވެ.
ނަމަވެސް އެވަގުތު އޭނާއަށް ފޯނުނެގެން ނެތީމާ ފަހުން ގުޅާނެ ވާހަކަ މެސެޖްކުރުމަށްފަހު، އޭގެ އިރުކޮޅެއް ފަހުން އޭނާ އެމުވައްޒަފަށް ގުޅީމާ ވިދާޅުވީ އިސްލާމީ މަރްކަޒާއި ސަލްމާން މިސްކިތް ފިޔަވާ އެހެން މިސްކިތެއްގައި ކުލާސްތަައް ކުރިޔަށް ގެންދިޔުމަށް އޭނާގާ ގާތުގައި ބުނުމަށް މުވައްޒަފަށް އަންގާފައިވާކަމަށް ކަމަށެވެ. އެއަމުރު ނެރުނީ ކޮން ބޭފުޅެއްތޯ ސުވާލު ކުރުމުން ވިދާޅުވީ ތިމަންނާ އަށް އެންގީ ޑެޕިޔުޓީ މިނިސްޓަރ މުޠީޢު ވިދާޅުވުމުން ފޯނު ބާއްވާފައި، އެކަން އެގޮތަށް ހިނގައިފި ކަމާއި، އެއީ މިނިސްޓަރ ނުވަތަ މިނިސްޓްރީގެ ނިންމުމެއްތޯ ސާފުކޮށްދެއްވުމަށް އެދުނުކަމަށް އިޔާޒްގެ އެކްސް ޕޯސްޓުގައި ލިޔުއްވާފައި ވެއެވެ.
ނަމަވެސް އެސިޓީ އަށް އަދި އެއްވެސް ޖަވާބެއް ނުލިބޭކަން ފާހަގަކޮށް،، ކުލާސް ހުއްޓާލީ އަޅުގަޑު އަމިއްލަ އަށް ކަމަށް ދޭހަވާ ގޮތަށް މިނިސްޓަރ ޝަހީމް ދޮގު ފަތުރުއްވާތީވެ، ޙަޤީޤަތް ހާމަކުރުމުގެ ގޮތުން މިވާހަކަ ލިޔަން މަޖްބޫރުވީ ކަމުގައިވެސް ޑރ. އިޔާޒް ވިދާޅުވެފައި ވެއެވެ.
އިސްލާމްދީނަށް ޙުރުމަތްކޮށް ހިއްތެވުމަށް މާތް ﷲ ގަންދީ ހުވާކުރައްވައިގެން ހުންނަވާ މިފަދަ ދަށުދަރަޖައިގެ ޢަމަލެއް މިނިސްޓަރ ހިންގަވާތީ އެކަމާ ނުހަނު ހިތާމަކުރަމެވެ. އަދި ތައުބާވުމަށް ގޮވާލަމެވެ.
އިޔާޒްގެ އެކްސް ޕޯސްޓުގައި ލިޔުއްވާފައި ވެއެވެ.
އިޔާޒް އިތުރަށް ވިދާޅުވެފައިވަނީ، މީގެ ކުރިންވެސް ކަމެއް ދިމާވެއްޖެނަމަ، ނުވަތަ ރަށުން ބޭރަށް ދާންޖެހިއްޖެނަމަ ދަރުސް މެދުކަނޑާލާފައި، އެނބުރި އައިސް އަލުން ފަށައިގެން ކުރިޔަށް ގެންދެވޭ ކަމަށެވެ. ނަމަވެސް، މިފަހަރު ޙުކުމް ބަދަލުވެގެން މިއުޅެނީ ޙަމާސް ޖަމާޢަތުގެ ވެރިޔާ އިސްމާޢީލް ހަނިއްޔާ ޝަހީދުކޮށްލުމާއި ގުޅިގެން އެމަނިކްފާނުގެ މައްޗަށް ޣައިިބަށް ކަށުނަމާދު ކޮށްދިނުމަށް އެދުމުން، ބަޔަކު މީހުންގެ ފިއްތުމާއި ހުރެ އެކަން ކުރައްވަން ކެރިވަޑައިނުގެން، އެކަމުގެ މަތިޖެއްސެވުމަށް މިނިސްޓަރ ޝަހީމް ކުރައްވާ ސިލްސިލާ ކަންތައްތަކެއްގެ ސަބަބުން ކަމަށްވެސް އިޔާޒް ވިދާޅުވެފައި ވެއެވެ.
އިޔާޒްގެ ތަފްސީރު ކުލާސްތައް އެހެން މިސްކިތްތަކަށް ބަދަލުކުރަން އެންގި މައްސަލާގައި ޝަހީމްއާއި އިޔާޒް ބަހުގެ ހަމަލާތައް ރައްދު ކުރަމުންދާއިރު، ހަމާސް ޖަމާއަތުގެ ލީޑަރު އިސްމާއިލް ހަނިއްޔެ ޝަހީދު ކޮށްލުމާއި ގުޅިގެން، އޭނާގެ މައްޗަށް ޢައިބަށް ކަށުނަމާދު ކުރުމަށް ޑރ. އިޔާޒް ވަނީ މިސަރުކާރަށް ގޮވާލެއްވި މައްސަލާގައިވެސް ސޯޝަލް މީޑިއާގައި ޑރ. ޝަހީމްއާއި ޑރ. އިޔާޒްއާދެމެދު ވަނީ ބަހުގެ ހަމަލާތައް ބަދަލު ކޮށްފައެވެ.
