ރާއްޖޭގައި އިލެކްޓްރޯނިކް ވޯޓިންއަށް ދިއުމުގެ ވިސްނުމެއް ނެތްކަމަށް އިލެކްޝަންސް ކޮމިޝަނުން ބުނެފިއެވެ.
ރައްޔިތުންގެ މަޖިލިހުގެ މިނިވަން މުވައްސަސާގައި ވާހަކަ ދައްކަވަމުން އިލެކްޝަންސް ކޮމިޝަންގެ ރައީސް ފުވާދު ތައުފީގު ވިދާޅުވީ، ޔޫރަޕްގެ ގައުމުތަކުގައިވެސް އިލެކްޓްރޯނިކް ވޯޓިން އަށް ދިއުމަށްފަހު މިހާރު މެނުއަލް ވޯޓިންއަށް ރުޖޫއަވެފައިވާ ކަމަށާއި، ރާއްޖޭގައި ވޯޓު ލުމުގައި މިހާރު އޮތް ސިސްޓަމްއަކީ މުޅި ދުނިޔެވެސް ބަލައިގެންފައިވާ ސިސްޓަމެއް ކަމަށެވެ.
ފުވާދު ތައުފީގު ވިދާޅުވީ އިލެކްޓްރޯނިކް ސިސްޓަމްއަކަށް ދިއުމަކީ 2009 އަކުން ފެށިގެން ދެކެވެމުންދާ ވާހަކައެއް ކަމަށާއި، އެހެންނަމަވެސް އިލެކްޓްރޯނިކް ވޯޓިންއަކަށް ދިއުމަކީ އަބަދުވެސް އޭރަކު އޮންނަ ސަރުކާރަކުން ތާއީދުކުރާ އަދި އިދިކޮޅުގަ އޮންނަ ޕާޓީއަކުން ދެކޮޅު ހަދަމުންދާ ކަމެއް ކަމުގައެވެ. ޕީޕީއެމް އިދިކޮޅުގައި އޮތަސްވެސް، އަދި އެމްޑީޕީ އިދިކޮޅުގައި އޮތަސްވެސް އެކަން ހިގަމުންދަނީ އެހެން ކަމުގައި އިލެކްޝަންސް ކޮމިޝަނުން ވިދާޅުވިއެވެ.
ފުވާދު ވިދާޅުވީ އިލެކްޓްރޯނިކް ވޯޓިންއަށް ދިއުމަކީ ރައްޔިތުންވެސް ބަލައިގަންނާނޭކަމެއް ކަމަށް ނުބެލެވޭ ކަމުގައެވެ. އޭގެ ސަބަބެއްގެ ގޮތުގައި އޭނާ ވިދާޅުވީ، ވޯޓުލުމުގެ ނަތީޖާތައް މެނުއަލް ކޮށް ބަލާލެވެން ހުރުމާއި، ވޯޓު ކަރުދާސްވެސް އަތަށް ލިބޭގޮތަށް އޮތުން ކަމުގައެވެ.
އިލެކްޝަންސް ކޮމިޝަނުން ބުނެފައިވަނީ، އިލެކްޓްރޯނިކް ވޯޓިންއަށް ނުދިއުމަށް އެކޮމިޝަނުން ރަސްމީކޮށް ނިންމާފައިވާނެކަމަށާއި، އެހެންނަމަވެސް އެކަމަށްޓަކާ ގާނޫނެއް ފާސްކޮށްފިނަމަ ކޮމިޝަނުން އެކަމަށްޓަކާ ކުރަންޖެހޭ މަސައްކަތް ކޮމިޝަނުން ކުރިޔަށް ގެންދަވާނެކަމަށް އިލެކްޝަންސް ކޮމިޝަނުން ވިދާޅވެފައި ވެއެވެ.
