ކޮޕީރައިޓްގެ ހައްގުތަކަށް ހިމާޔަތް ލިބިދެވޭ މުއްދަތު 50 އަހަރުން 70 އަހަރަށް އިތުރުކުރުމަށާއި ކޮޕީރައިޓާ ގުޅޭ ހައްގުތައް ކަށަވަރު ކުރުމާއި އެ ނޫންވެސް ގާނޫނު ތަންފީޒު ކުރުމުގައި ދިމާވާ ބައެއް ދަތިތައް ހައްލުކުރުމަށް، ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނަށް އިސްލާހު ހުށަހަޅައިފިއެވެ.
މި ބިލް ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅުއްވީ ނިލަންދޫ ދާއިރާގެ މެންބަރު ފާތިމަތު ސައުދާއެވެ.
ސަރުކާރުން މި ބިލު ހުށަހެޅުމުގެ މަގުސަދެއްކަމަށް ބަޔާން ކޮށްފައި ވަނީ ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނުގެ ދަށުން ކޮޕީރައިޓްގެ ހިމާޔަތް ލިބިދޭ އުފެއްދުންތަކާއި ކޮޕީރައިޓާގުޅޭ އެ ނޫންވެސް ހައްގުތަކާ ގުޅޭ ކަންކަން އިތުރަށް ތަފުސީލުކުރުމެވެ.
އޭގެ އިތުރުން ނުކުޅެދުންތެރިކަން ހުންނަ ފަރާތްތަކަށް ލިބިދޭ އިސްތިސްނާއާއި ވިޔަފާރި ފައިދާ ނުލިބޭ ގޮތަށް ދިރާސާކުރުމުގެ ބޭނުމަށް ލިބިދޭ އިސްތިސްނާ ހިމެނޭ ގޮތުން ކޮޕީރައިޓަޑް އުފެއްދުންތައް ނަކަލު ކުރެވޭނެ ނުވަތަ ބޭނުން ކުރެވޭނެ އިތުރު ހާލަތްތައް ކަނޑައެޅުމާއި ކޮޕީރައިޓްގެ ހައްގުތަކަށް ހިމާޔަތް ލިބިދެވޭ މުއްދަތު 50 އަހަރުން 70 އަހަރަށް އިތުރުކުރުންވެސް މިގާނޫނަށް އިސްލާހު ހުށަހެޅި މަގުސަދުތަކުގެ ތެރޭގައި ބަޔާން ކޮށްފައި ވެއެވެ.
ބިލުގައި ބުނެފައިވާ ގޮތުން މި ގާނޫނުގެ ދަށުން ހިމާޔަތް ކޮށްދީފައިވާ އެއްވެސް ފަރާތެއްގެ ހައްގަކަށް އަރައިގެންފިނަމަ އެކަމަކުން ލިބުނު ފައިދާގެ މައްޗަށް ބަލައި ކޯޓުން ބަދަލު ނަގައިދޭންވާނެ ކަމަށެވެ.
އަދި އެ ގާނޫނުގެ ދަށުން ހިމާޔަތްކޮށްދީފައިވާ ހައްގަކަށް ގަސްތުގައި އުނިކަމެއް އަންނާނެ ގޮތަކަށް އަމަލުކޮށްފިނަމަ ނުވަތަ ކޮޕީރައިޓްގެ ވެރިފަރާތައް ގެއްލުންވާނެކަން އެނގިހުރެ އެފަދަ އަމަލެއް ކޮށްފިނަމަ، އެއީ ކުށެއް ކަމަށާއި އެ ކުށުގެ އަދަބަކީ އެ އަމަލެއްގެ ކުޑަބޮޑުމިނަށް ބަލައި 50،000 ރުފިޔާއާއި 300،000 ރުފިޔާއާ ދެމެދުގެ އަދަދަކުން ޖޫރިމަނާކުރުން ކަމަށްވެސް ހިމަނާފައިވެއެވެ.
