އާދެ! މިއަދަކީ މުޙައްރަމް މަހެއްގެ 1 ވަނަ ދުވަހެވެ. މިއަދަކީ ހިޖުރީ އާއަހަރު ފެށޭ ދުވަހެވެ. މިއީ މުސްލިމުން އެބައިމީހުންގެ އަހަރު ގުނަންފަށާ ދުވަހެވެ.
ހިޖުރީ ތާރީޚު އުފަންވެގެން އައީ މާތް ޚަލީފާ ޢުމަރު ބުނުލް ޚައްޠާބު رضي الله عنه ގެ އިރުޝާދުފުޅާ އެކުއެވެ. ފަހެ ތާރީޚު ލިޔުމުގައި ޙިޖުރީ ތާރީޚަށް ރިޢާޔަތްކުރުމަށް ނިންމަވައި އަމުރު ކުރެއްވެވިއެވެ. މިކަން މިގޮތަށް ކުރެއްވެވީ އެކަލޭގެފާނުގެ އަރިހަށް ހުށައެޅުނު ދަރަންޏެއްގެ މައްސަލައިގައި ތާރީޚެއްގެ މައްސަލަ ދިމާވެގެންނެވެ.
މި މައްސަލައިގައި އޮންނަނީ ދަރަނި ނެގި މީހާ ދަރަނި އަދާންކުރަންޖެހެނީ ޝަޢުބާން މަހެއްގައި ކަމަށެވެ. ކޮން އަހަރެއްގެ ޝަޢުބާން މަހެއްކަމެއް އެނގޭކަށް ނެތެވެ. މިހެންވެ އިސްލާމީގޮތުން ބަލާނެ ތާރީޚެއް ކަނޑައެޅުމުގެ މުހިންމުކަން އެކަލޭގެފާނަށް ވިސްނިވަޑައިގަތެވެ. މަޝްވަރާގެ މަރްޙަލާގައި 3 ރައުޔެއް ހުށައެޅުނެވެ.
އެއީ ހިޖުރީ ތާރީޚު، رسول الله صلى الله عليه وسلم ދުނިޔޭގެ އަލިކަން ދެކެވަޑައިގެން ދުވަހުން ފެށިގެން ގުނަން ފެށުމެވެ. އަނެއް ރައުޔަކީ އެކަލޭގެފާނު ރަސޫލުކަމައިގެން ފޮނުއްވުނު ޙާދިސާއިން ފެށިގެން ތާރީޚު ގުނަންފެށުމެވެ.
ނަމަވެސް ދެންތިއްބެވި ބޭކަލުންނާއި އެކު ޢުމަރުގެފާނާއި، ޢުޘްމާންގެފާނާއި ޢަލީގެފާނު ފަދަ ބޭކަލުންނަށް ބުރަވެވަޑައިގެންނެވުނީ ހިޖުރީ ތާރީޚުގެ ފެށުމަކަށް رسول الله صلى الله عليه وسلم ކުރެއްވެވި ހިޖުރައިގެ ޙާދިސާ ހެއްދެވުމަށެވެ. އަދި މިރައުޔަށް އާނ ބަސް ލިބި ހުރިހާ ބޭފުޅުންވެސް މިކަމުގައި އިއްތިފާޤްވެވަޑައިގަތެވެ.
މި އެއްބަސްވުން ހިނގައި ހިޖުރީ ތާރީޚަށް ޢަމަލުކުރަން ފެށުނީ ހިޖުރީ ސަނަތުން 17 ވަނަ އަހަރުގައެވެ. އެއީ جمادى الآخرة މަހުގެ 20 ވަނަ ވީ ބުދަ ދުވަހުއެވެ.
އާދެ! ހިޖުރީ އާ އަހަރުގެ ވާހަކަ ދައްކާއިރު ރަސޫލު ﷲ صلى الله عليه وسلم ކުރެއްވެވި ހިޖުރައިގެ މަތިވެރި ޒިކުރާ އާކުރަންޖެހެއެވެ.
މައްކާގައި 13 އަހަރު ހޭދަ ކުރެއްވެވީ ﷲ ގެ ދީނަށް ގޮވާލުމުގެ ބުރަ މަސްއޫލިއްޔަތު އަދާކުރެއްވުމުގައެވެ. ﷲ ގެ ދީން ފެތުރުއްވުމުގައި ގަދަފަދަ ކަމާއެކު ސާބިތުވެ ހުންނެވިއެވެ. އެގޮތުން އެކަލޭގެފާނު ކަޑައްތު ނުކުރައްވާ ކަނޑެއް ނެތެވެ. ނުފޮރޮޅުއްވާ ގާ ކޮޅެއް ނެތެވެ. ނަމަވެސް އެމީހުންގެ ގިނަ މީހުން ދިނީ ބީރު ކަންފަތެކެވެ. ބަދަލުގައި ނަފްރަތު ކުރިއެވެ. އަދި އެކަލޭގެފާނުންގެ ލެޔަށް ފެންބޮވައިގަތެވެ. އެކަލޭގެފާނުންގެ ލޯބިވާ ވަޒަން ދޫކޮށްލަންވަން ޖެހިވަޑައިގަތީ އެކަލޭނގެފާނުންގެ ފުރާނަފުޅު ދުއްވާލަން މައްކާގެ މުޝްރިކުން ރާވައި އެކަން ތަންފީޒުކުރަން އުޅުމުންނެވެ.
އެޙާލަތުގައި ވެސް އެކަލޭގެފާނު ނުކުންނެވީ ﷲ ގެ އަމުރުފުޅަށެވެ. އެކަލޭގެފާނުންގެ ބުރަ މަސައްކަތްޕުޅުގެ ނަތީޖާއަކަށް ވީ ﷲ ތަޢާލާ އެކަލޭގެފާނުން ސަލާމަތްކޮށްދެއްވުމެވެ. އެކަލޭގެފާނަށް ނަޞްރުދެއްވުމެވެ. މުޝްރިކުންގެ ނުބައިރޭވުންތައް ނާކާމިޔާބު ކޮށްލެއްވުމެވެ.
ފަހެ ﷲ އެކަލާނގެ ދީންމަތީގައި ސާބިތުވާ އަޅުތަކުން ދޫކޮށެއް ނުލައްވާނެއެވެ. ވަރުބަލިވެ ދޫކޮށްލަނީ އަހުރެމެންނެވެ. އާދެ! ހިޖުރައިގެ މާނަ އެއްކަމަކަށް ހަޞްރުކުރުމަށްވުރެ އޭގެ މާނަ މާ ފުޅާވެފައި ތަނަވަހެވެ. އެގޮތުން ﷲ ނަހީ ކުރެއްވި ކަންކަމުން ދުރުހެލި ވުމަކީވެސް ބޮޑު ހިޖުރައެކެވެ. ނުބައިމަގުން ރަނގަޅުމަގަށް ހިޖުރަ ކުރުމެވެ. މިއީ ކައު ސާހިބާ ބަޔާން ކޮށްފައިވާ ގޮތުން ހަގީގީ އެއް ހިޖުރައެވެ.
ކޮންމެ އާ އަހަރާކާއި އެކުވެސް އަޅުގަނޑުމެން ހަނދާނުގައި ބަހައްޓަންވީ އަޅުގަނޑުމެންގެ ޢުމުރު މަޑުމަޑުން ހުސްވަމުންދާ ކަމެވެ. ކާމިޔާބުގެ ވެރި މީހަކީ މިކަން ދަނެ ޢަމަލުތައް އިޞްލާހު ކުރާމީހާއެވެ. ހިޖުރައިގެ ވާހަކަތައް ދައްކައި ކޮޅުންނުލާހައިވެސް ދިގެވެ. ނަމަވެސް ހުރިހާ ވާހަކަ ތަކަކީ މިފަދަ ކުރު އާޓިކަލްއެއްގައި ގެނެސްދެވޭނެ ވާހަކަތަކަކަށް ނުވާތީ މިހާހިސާބަށް ކުރުކޮށްލަމެވެ.
ލިޔުން ކިޔުއްވީތީ ޝުކުރު ދަންނަވަމެވެ.
