ޒަކާތު ފަންޑުން މިދިޔަ އޮގަސްޓު މަހު 5.1 މިލިއަން ރުފިޔާގެ އެހީ ދޫކޮށްފިއެވެ. މިއީ ވޭތުވެދިޔަ އަހަރުގެ އޮގަސްޓު މަހު ދޫކުރި 4.6 މިލިއަން ރުފިޔާއަށްވުރެ 12 ޕަސެންޓުގެ އިތުރުވުމެކެވެ.
މޯލްޑިވްސް ޒަކާތު ހައުސްގެ ތަފާސްހިސާބުތަކުން ދައްކާ ގޮތުގައި، ފީސަބީލިﷲގެ ބައިން 2.5 މިލިއަން ރުފިޔާ ހޭދަކޮށްފައިވެއެވެ. އޭގެ ތެރޭގައި ދީނީ ޕްރޮގްރާމްތަކަށް އެއް މިލިއަން ރުފިޔާ، މަތީ ތަޢުލީމަށް 797,604 ރުފިޔާ، ފޮތް ތަރުޖަމާކުރުމަށް 579,585 ރުފިޔާ، އަދި ހިފްޒު ޕްރޮގްރާމްތަކާއި ކީރިތި ޤުރުއާނުގެ ޢިލްމު ފެތުރުމަށް 120,414 ރުފިޔާ ހިމެނެއެވެ.
ފަގީރުންނާއި މިސްކީނުންގެ ބައިން ގާތްގަނޑަކަށް 2.3 މިލިއަން ރުފިޔާ ހޭދަކޮށްފައިވާއިރު، މީގެ ބޮޑުބައި ދޫކޮށްފައިވަނީ ބޭސްފަރުވާގެ އެހީގެ ގޮތުގައެވެ. ޒަރޫރީ ބޭނުންތަކަށް 42,500 ރުފިޔާ ދޫކޮށްފައިވެއެވެ.
މީގެ އިތުރުން ދަރަނިވެރިންނަށް 60,061 ރުފިޔާ އާއި ހާލުގައި ޖެހިފައިވާ ދަތުރުވެރިންނަށް 19,834 ރުފިޔާ ދޫކޮށްފައިވެއެވެ.
އޮގަސްޓު މަހުގެ ތެރޭގައި ޒަކާތު ފަންޑަށް 7.3 މިލިއަން ރުފިޔާ ލިބިފައިވެއެވެ.
ކޮމެންޓު ފޮނުވާ