ވިކްޓިމް ސަޕޯޓްގެ ދާއިރާގައި މަސައްކަތްކުރާ ސޯޝަލް ވަރކަރުންނާއި ޕްރޮސިކިއުޓަރުންނާއި ފުލުހުންނާއި ފަނޑިޔާރުންނާއި އަދި ކިޔަވާ ކުދިންނަށް އަަމާޒުކޮށްގެން ޕީޖީ އޮފީހުން މަހަކު އެއްފަހަރު ނެރޭ، މިއޮފީހުގެ ވިކްޓިމް ސަޕޯޓް ނިއުސްލެޓަރ "ނިޔާވެހި" ގެ ދެވަނަ ޢަދަދު ނެރެފިއެވެ.
މިޢަދަދުގައި، ހެކިންގެ ހެކިބަސް ނަގައި ނިމުނަސް، ހެކިންނަށް ނުފޫޒު ފޯރުވުމުގެ އިޙުތިމާލު ދެމިއޮތްކަމާށް ބަލަންޖެހޭކަމަށް، ދިވެހިރާއްޖޭގެ ސުޕްރީމް ކޯޓުން ނިންމަވާފައިވާ ނިންމެވުމެއްގެ ތަފްޞީލާއި، ދައުވާލިބޭ މީހާއާ ވަކި ގެއެއްގައި އަނިޔާ ލިބޭ މީހާ ދިރިއުޅުމަކީ އޭނާގެ ސަލާމަތަށް ނުރައްކާ ނެތް ސަބަބެއްކަމަށް ބަލައިގެން ނުވާނެކަމަށް ބުނާ ސުޕްރީމް ކޯޓުގެ ނިންމުމެއެްގެ ވާހަކަ ތަފްޞީލުކޮށްފައިވެއެވެ.
މީގެ އިތުރުން، ކުޑަކުދިންނާ ދެކޮޅަށް ހިންގޭ ކުށަކާ ގުޅިގެން ހެކިބަސް ދިނުމަށް ޢުޛުރުވެރިނުވެވޭނެކަމަށް އޮތް ހެއްކާބެހޭ ޤާނޫނުގެ 56 ވަނަ މާއްދާގެ ތަފްޞީލާބެހޭ ގޮތުންވެސް ލިޔެފައިވެއެވެ.
ނިޔާވެހި އަކީ ސަބްސްކްރައިބްކޮށްގެން ކިޔޭގޮތަށް ފަރުމާ ކުރެވިފައިވާ ނިއުސްލެޓަރއެކެވެ. ސަބްސްކްރައިބްކުރެއްވުމުން، ޕީޖީ އޮފީހުގެ އޮންލައިން ޕޯޓަލްގެ ތެރެއިން ނިޔާވެހި ގެ ހުރިހާ ޢަދަދުތަކެއް ފެންނާނެކަމަށްވެސް އެ އޮފީހުން ބުނެފައި ވެއެވެ.
