ކޯވިޑް19ގެ ސަބަބުން ދަތިކަން ފޯރާފައިވާ ފަރާތްތަކަށް އެހީތެރިކަން ފޯރުކޮށް ދިނުމަށް އެމެރިކާގެ ކޮންގްރެސްއިން ފާސްކުރުމަށް އެއްބަސްވެފައިވާ 900 ބިލިއަން ޑޮލަރުގެ ކޯވިޑް ރިލީފް ޕެކޭޖާއި ޓްރަމްޕް ދެކޮޅު ހައްދަވައިފިއެވެ.
ޓުވިޓަރ މެދުވެރިކޮށް އާންމު ކުރެއްވި ވީޑިއޯ މެސެޖެއްގައި ޓްރަމްޕް ވަނީ، 900 ބިލިއަން ޑޮލަރުގެ މި ޕެކޭޖުގައި ހިމެނޭ "ބޭކާރު ޚަރަދުތައް" ކަޑާލާއި އަލުން ބިލް މުރާޖަޢާ ނުކޮށްފި ނަމަ، މި ބިލަށް އަމަލު ކުރުމުގެ ފުރުސަތު ނުދެއްވާނެކަމުގެ އިންޒާރު ދެއްވާފައެވެ. އަދި ވިދާޅުވެފައިވަނީ، މި ބިލަކީ "ލަދުވެތި" ބިލެއް ކަމުގައެވެ.
"މި ބިލަށް މިމީހުން ނަން ދީފައިވަނީ ކޯވިޑް ރިލީފް ބިލްގެ ނަމުން. އެހެންނަމަވެސް، ކޯވިޑާއި ގުޅުންހުރި އެއްވެސް ކަމެއް މިބިލުގައި ހިމެނިފައެއް ނެތް،" ވީޑިއޯ މެސެޖުގައި ޓްރަމްޕް ވިދާޅުވެފައި ވެއެވެ.
މި ބިލް މިހާރު ފަރުމާ ކޮށްފައި އޮތް ގޮތުން، 900 ބިލިއަން ޑިލަރުގެ މި ބިޔަ ޕެކޭޖުން، އެމެރިކާގެ، ވަކި ވަރަކަށްވުރެ ދަށްކޮށް އާމްނަދީ ލިބޭ ފަރާތްތަކަށް 600 އެމެރިކާ ޑޮލަރުގެ ފައިސާގެ އެހީތެރިކަން ލިބޭނެއެވެ. އަދި މީގެ އިތުރުންވެސް، ކުދި އަދި މެދުފަންތީގެ ވިޔަފާރިތަކާއި އަދި އެނޫން ދާއިރާތަކަށްވެސް ވެދޭނެ އެހީތަކުގެ ތަފާތު ގިންތިތައް ހިމަނާފައި ވެއެވެ.
އަންނަ ޖެނުއަރީމަހު 20 ވަނަ ދުވަހު ދައުރު ހަމަކުރައްވާ، ވެރިކަންމުން ފައިބައި ވަޑައިގަންނަވަން ޖެހިވަޑައިގެންފައިވާ ޓްރަމްޕް، ހޯމަ ދުވަހުގެ ރޭގެ ވޯޓަށްފަހު، މިބިލްގައި ސޮއިކޮރައްވާ ގާނޫނަކަށް ވެގެންދާނެކަމަށް ވަނީ ބެލެވިފައެވެ.
ބިލަށް ފާޑު ވިޑާޅުވަމުން ޓްރަމްޕް ތުހުމަތު ކުރައްވާފައިވަނީ، މި ބިލުން ކުރަން ހުރި ހޭދަތަކުގެ ބޮޑުބައި ދާނީ، ދުނިޔޭގެ އެހެން ގައުމުތަކަށް ކަމުގައެވެ. ޓްރަމްޕް ވިދާޅުވެފައިވަނީ، 900 ބިލިއަން ޑޮލަރުގެ މިބިޔަ ޕެކޭޖުގެ ބޮޑުބައެއް ދުނިޔޭގެ އެހެންގައުމުތަކަށް ދިނުމުގެ ބަދަލުގައި، މިފައިސާ ލިބެންވާނީ ދަތިހާލުގައި ޖެހިފައިވާ އެމެރިކާގެ ރައްޔިތުންނަށް ކަމުގައެވެ.
ޓްރަމްޕް ވިދާޅުވި ގޮތުގައި، "މިބިލުގައި ވަނީ، 85 މިލިއަން ޑޮލަރުގެ އެހީތެރިކަން ކެމްބޯޑިއާއަށް، 134 މިލިއަން ޑޮލަރު ބަރުމާއަށް، 1.3 ބިލިއަން ޑޮލަރު، ރަޝިއާގެ އެންމެ ފަހުގެ ހަތިޔާރު ގަތުމަށްޓަކާ މިސްރަށާއި އަދި މިސްރުގެ އަސްކަރިއްޔާއަށް، ޕާކިސްތާނުގެ ސަރުކާރުން ހިންގާ ޑިމޮކްރަސީއާއި އަދި ޖިންސީ ހަމަހަމަކަމާ ގުޅޭ ޕްރޮގްމަތަކަށް 25 މިލިއަން ޑޮލަރު، އަދި މީގެ އިތުރުން ބެލީޒް، ކޮސްޓަރިކާ، އެލް ސަވޭޑޯރ، ގައުޓެމާލާ، ހޮންޑޫރާސް، ނިކަރާގުއާ އަދި ޕެނަމާއަށް 505 މިލިއަން ޑޮލަރު ދޭންޖެހެ" އެވެ.
ޓްރަމްޕް ވަނީ، ވޮޝިންގޓަން ޑީސީގައި ހުރި، އަދި ހުޅިވިފައިވެސް ނުވާ، ކެނެޑީ ސެންޓަރަށް 40 މިލިއަން ޑޮލަރު ދޭން ނިންމާފައިވާތީ އެކަމާވެސް ސުވާލު އުފައްދާފައެވެ. އަދި މީގެ އިތުރުން، ކެޕިޓަލް ހިލްގައި ހުރި ދާރުލް އާސާރުތަކާއި އަދި ގެލެރީ ތަކަށް 1 ބިލިއަން ޑޮލަރު ދޭން ނިންމާފައިވަނީ ކިހިނެއް ވެގެންތޯވެސް ޓްރަމްޕްވަނީ ސުވާލު އަފައްދާފައެވެ.
"އަހަރެން މި އެދެނީ، އެމެރިކާގެ ވަކިވަރަކަށް ވުރެ ދަށްކޮށް އާމްދަނީ ލިބޭ ކޮންމެ މީހަކަށް މި ބިލްގައި ހިމަނާގައި އޮތް ތާކުންތާކު ނުޖެހޭ 600 ޑޮލަރު، 2000 ނުވަތަ 4000 ޑޮލަރަށް މަތިކޮށް، ކޮންގްރެސްއިން މިބިލް މުރާޖައާ ކުރުމަށް،" ޓްރަމްޕް ވިދާޅުވެފައި ވެއެވެ.
ކޮންގްރެސްއިން މިބިލް ފާސްކޮށް، އެހެންނަމަވެސް، ޓްރަމްޕް މި ބިލް ވީޓޯ ކޮށްފިނަމަ، މި ޑިސެމްބަރު މަހުގެ 29 ވަނަ ދުވަހަށްފަހު، އެމެރިކާގެ ސަރުކާރު ހުއްޓުމަކަށް އައުމުގެ ބިރު ވަނީ ހީވެފައެވެ. ސަބަބަކީ، އެމެރިކާ ސަރުކާގެ އެތައް ފެޑެރަލް އެޖެންސީއެއް، ކުރިޔަށް އޮތް 9 މަސްދުވަހަށް ހިންގުމަށް ބޭނުންވާ އެތައް މިލިއަން ޑޮލަރެއްގެ ފައިސާއެއް މިބިލްގައި ހިމަނާފައި ވާތީއެވެ.
ރިލީފް ޕެކޭޖުގައި ހިމެނިފައިވާ މުހިންމު ބައެއް ބައިތައް:
އެމެރިކާގެ ގާނޫނު ހަދާ މަޖިލިހުން އެއްބަސް ވުމަކަށް އައިސްފައިވާ މި ރިލީފް ޕެކޭޖުގެ ތަފްސީލު ރަސްމީކޮށް އަދި ހާމަ ކޮށްފައި ނުވިނަމަވެސް، ހައުސް އޮފް ރެޕްރެސެންޓޭޓިވްސް އާއި އަދި ސެނެޓުގެ އިސް ލީޑަރުންވަނީ، މި ރިލީފް ޕެކޭޖުގެ މުހިންމު މައިގަޑު ބައިތައް ހާމަ ކުރައްވާފައެވެ.
- ހާލުގައި ޖެހިފައިވާ ކޮންމެ ބޮޑު މީހަކާއި އަދި ކުޑަ ކުއްޖަކަށް 600 އެމެރިކާ ޑޮލަރަށްވުރެ އިތުރު ނުވާ ގޮތަށް ފައިސާގެ އެހީތެރިކަން
- ކުދި އަދި މެދުފަންތީގެ ވިޔަފާރިތަކުން ނަގާފައިވާ ލޯނުތައް އަދާކުރުމަށް އެހީތެރި ވެދިނުމަށް 284 މިލިއަން ޑޮލަރު
- މޫވީ ތިއޭޓަރުތަކާ، ސަގާފީ އިންސްޓިޓިއުޝަންތަކަށާއި އަދި ލައިވް އިވެންޓްތައް ބާއްވާ ތަންތަން ހިންގާ ފަރާތްތަކަށް އެހީތެރިކަން ފޯރުކޮށް ދިނުމަށް 15 ބިލިއަން ޑޮލަރު
- ވަޒީފާ ގެއްލޭ ފަރާތްތަކަށް ލިބިދޭ އިންޝުއަރެންސްގެ ރައްކާތެރިކަން ފޯރުކޮށްދިނުމަށް ކޮންމެ ހަފްތާއަކު 300 ޑޮލަރު
- ތަންތަނުގެ ކުލި ދެއްކުމަށް ދަތިވެފައިވާ ފަރާތްތަކަށް އެހީތެރިކަން ފޯރުކޮށް ދިނުމަށް 25 ބިލިއަން ޑޮލަރު
- ސްކޫލަތަކާއި ކޮލެޖްތައް ފަދަ، ތައުލީމު ފޯރުކޮށްދޭ ފަރާތްތަކަށް އެހީތެރިކަން ފޯރުކޮށްދިނުމަށް 82 ބިލިއަން ޑޮލަރު. މީގެ ތެރޭގައި، ކްލާސް ރޫމްތައް ރައްކާތެރިކަމާއެކު އަލުން ހުޅުވުމަށް ފޯރުކޮށްދެވޭ އެހީތެރިކަންވެސް ހިމެނޭ
- ޗައިލްޑް ކެއަރގެ ޚިދުމަތްދޭ ފަރާތްތަކަށް އެހީތެރިކަން ފޯރިކޮށް ދިނުމަށް 10 ބިލިއަން ޑޮލަރު
- ނިއުޓްރިޝަން އެސިސްޓޭންސް އާއި ޗައިލްޑް ނިއުޓރިޝަން ބެނެފިޓް ޕްރޮގްރާމްތައް ހިންގުމަށް އެހީތެރި ވުމަށް 13 ބިލިއަން ޑޮލަރު
- ޕެންޑަމިކްގެ ދުވަސްވަރު، ގޭގައި ތިބެގެން އޮންލައިންކޮށް މަސައްކަތް ކުރުމުގެ ފުރުސަތު ފަހިކުރުމަށް އެހީތެރވެދިނުމުގެ ގޮތުން، ބްރޯޑްބޭންޑުގެ ހިދުމަތް ފަސޭހަކުރުމަށް 7 ބިލިއަން ޑޮލަރު
- ކޯވިޑް19 ވެކްސިން އެއްތަނުން އަނެއްތަނަށް ފޯރުކޮށް ދިނުމަށާއި، ޓެސްޓް ކުރުމާއި އަދި މީގެއިތުރުން ސިއްޙީ ޚިދުމަތްތެރިން ކުރިޔަށް ގެންދާ ކޮންޓެކް ޓްރޭސިންއަށް އެހީތެރި ވެދިނުމަށް އެތައް ބިލއަން ޑޮލަރެއް.
- ބަލިވުމުން ދޭ ޗައުޓީ މުވައްޒަފުންނަށް ދިނުމަށް ވަޒީފާ ދޭފަރާތަކަށް އެހީތެރިވެދިނުމުގެ ގޮތުން ކުންފުނިތަކަށް ފޯރުކޮށްދެވޭ "ޓެކްސް ކްރެޑިޓް"ގެ އިނާޔަތް.
