ރައްޔިތުންގެ މަޖިލީހުގެ މެންބަރުންގެ މާލީ ބަޔާން ހާމަކުރުމަށް ޓްރާންސްޕޭރެންސީ މޯލްޑިވްސްއިން ގޮވާލާފައިވަނީ، އުސޫލު އޮންނަ ގޮތް ސާފުނުކޮށްކަމަށް މަޖިލީހުން ބުނެފިއެވެ.
ރައްޔިތުންގެ މަޖިލީހުގެ މެންބަރުން މަގާމުގެ ހުވާ ކުރެއްވިއިރު، ހުށަހަޅަންޖެހޭ މާލީ ބަޔާން ހުށަނާޅާތީ ކަންބޮޑުވުން ފާޅުކޮށް، ކުރި ޓްވީޓެއްގައި ޓްރާންސްޕޭރެންސީން ބުނީ، މަޖިލިސް މެންބަރުންގެ ހިއްސާ ވިޔަފާރިތަކުގައި އޮތީ ކިހައިވަރަކަށްކަން އެ ބޭފުޅުންނަށް ވޯޓު ދިން ރައްޔިތުންނަށް ސާފު ވާންޖެހޭނެ ކަމަށެވެ.
ރައްޔިތުންގެ މަޖިލީހުގެ އިދާރާއިން ބުނީ، ރައްޔިތުންގެ މަޖިލީހުގެ ޤަވާއިދުގެ 68 ވަނަ މާއްދާގެ (ށ)ގައި ބަޔާންކޮށްފައިވަނީ މަޖިލީހުގެ މެންބަރުންގެ މުދަލާއި ފައިސާގެ ބަޔާން ނުވަތަ މާލީ ބަޔާން ހުށަހަޅަންވާނީ, އެ މެންބަރެއްގެ މެންބަރު ކަމުގެ ހުވާކުރާ ތާރީޚުން ފެށިގެން އެއް އަހަރުދުވަސް ފުރިހަމަ ވުމުންކަމަށެވެ.
އެހެންކަމުން 20 ވަނަ ރައްޔިތުންގެ މަޖިލީހުގެ މެންބަރުންގެ މާލީ ބަޔާން ހުށަހަޅުއްވަންޖެހޭނީ އަންނަ އަހަރުގެ މޭ 28 ވަނަ ދުވަހަށް އެއް އަހަރުފުރުމަށްފަހު, އަންނަ އަހަރުގެ އޯގަސްޓް 31 ގެ ކުރިންކަމަށް މަޖިލީހުން ވަނީ ބުނެފައެވެ.
އެހެންކަމުން ޓްރާންސްޕޭރެންސީ މޯލްޑިވްސްއިން ރައްޔިތުންގެ މަޖިލީހުގެ މެންބަރުންގެ މާލީ ބަޔާން ހާމަކުރުމަށް ގޮވާލާ ޓުވީޓުކޮށްފައިވަނީ މާލީ ބާޔާން ހާމަކުރަމުންދާ އުސޫލު ރަނގަޅަށް ސާފުނުކޮށްކަމަށް މަޖިލީހުގެ އިދާރާއިން ވަނީ ބުނެފައެވެ.
19 ވަނަ މަޖިލީހުގެ މެންބަރުންގެ ފާއިތުވި 4 އަހަރުގެ މާލީ ބަޔާން ރައްޔިތުންގެ މަޖިލީހުގެ ވެބްސައިޓުން ފެންނާނެކަމަށާއި، އަދި އެބޭފުޅުންގެ 5 ވަނަ އަހަރުގެ މާލީ ބަޔާން އެ މެންބަރުން ހުށަހަޅުއްވާނީ މި އަންނަ އޯގަސްޓް މަހުގެ 31 ގެ ކުރިންކަމަށްވެސް މަޖިލީހުގެ އިދާރާއިން ބުނެފައިވެއެވެ.
