ގއ. ވިލިނގިލީގައި 18 އަހަރު ނުފުރޭ އަންހެން ކުއްޖަކަށް ރަށު މީހުން ގަނާ ކުރަމުން އަންނަ މައްސަލައެއް ބަލަން ފަށައިފި އެވެ.
ކުއްޖާގެ އާއިލާގެ ބޭފުޅަކު “އެކްސް” ގައި ބުނެފައިވާ ގޮތުގައި ގަނާ ކުރަމުން އަންނަ މީހުން ދަނީ ސުކޫލު ތެރޭގައި ހިނގި ކަމަކާ ގުޅުވާ ކުއްޖާއާ ގުޅޭ ގޮތުން ދޮގު މައުލޫމާތު ރަށުގައި ފަތުރަމުންނެވެ.
ވިލިނގިލީގައި ކުޑަ އަންހެން ކުއްޖަކަށް ގަނާ ކުރަމުން ދަނީ ޖިންސީ މައްސަލައަކާ ގުޅުވައިގެންކަމަށް އެނގިފައި ވެއެވެ. ގަނާ ކުރުމުގައި 18 އަހަރު ނުފުރޭ ކުދިންނާއި, އެ ކުދިންގެ ބެލެނިވެރިންވެސް ހިމެނޭ ކަމުގެ އަޑުތައް ވަނީ އަޑުފެތުރިފަ އެވެ.
މިކަމާ ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެ މައްސަލަ ގުޅުންހުރި އިދާރާތަކާ އެކު ބަލަމުންދާ ކަމަށެވެ.
އަދި މިކަމުގައި މަސްލަހަތު ހިމެނޭ ފަރާތްތަކަށް ރައްކާތެރި މާޙައުލެއް ޔަގީންކޮށް ދިނުމަށް ކުރަންޖެހޭ ކަންކަން ވެސް ފުލުހުން ކުރަމުންދާ ކަމަށް އޭނާ ވިދާޅުވި އެވެ.
ކުޑަކުދިންނާމެދު އެކުދިންގެ ރައްކާތެރިކަމާއި ދިރިއުޅޭ މާޙައުލުގެ އުފާވެރިކަން ގެއްލޭ ޒާތުގެ ވާހަކަ ދެއްކުމާއި އެފަދަ ކަންކަން އެއްވެސް ފަރާތަކުން ނުކުރުމަށް ޝިފާން ވަނީ އިލްތިމާސް ކުރައްވާފަ އެވެ.
ކޮމެންޓު ފޮނުވާ