ފުލުހުން ތަހުގީގު ކުރަމުންދާ މައްސަލައަކާއި ގުޅިގެން ހައްޔަރުކުރި އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރުގެ މަގާމްގައި ހުންނެވި ފަތިމަތު ޝަމްނާޒް އަލީ ސަލީމް މަގާމުން ވަކިކޮށްފިއެވެ.
އެންވަޔަރަމަންޓު މިނިސްޓްރީގެ ވެބްސައިޓުގައި ވާގޮތުން އޭނާ މަގާމުން ވަކިކޮށްފައިވަނީ އިއްޔެއެވެ.
އެންވަޔަރަމަންޓު މިނިސްޓްރީގެ ވެބްސައިޓުގައި ސިޔާސީ މުވައްޒަފުން ތިބޭ ޕޭޖުން ޝަމްނާޒްގެ ނަން ވަކިކޮށް އޭނާގެ ނަން މިހާރު ހިމަނާފައިވަނީ ކުރީގެ ސިޔާސީ މުވައްޒަފުންގެ ލިސްޓުގައެވެ.
ފުލުހުން ކުރިން ހާމަކޮށްފައިވާ ގޮތުގައި ޝަމްނާޒްއާއެކު އިތުރު 2 މީހަކުވެސް ވަނީ ހައްޔަރު ކޮށްފައެވެ. އަދި މި 3 މީހުންވެސް 7 ދުވަށް ބަންދުކުރުމަށް ކުރިމިނަލް ކޯޓުން ވަނީ އަމުރު ކޮށްފައެވެ.
ސޯޝަލް މީޑިއާގައި ފެތުރެމުންދާ ބައެއް މައުލޫމާތުތަކުން އެނގޭ ގޮތުގައި ޝަމްނާޒްގެ މައްޗަށް ކުރެވެނީ ސިހުރު ހެދިކަމުގެ ތުހުމަތެވެ.
ސްޓޭޓް މިނިސްޓަރުކަމަށް އައްޔަން ކުރުމުގެ ކުރިން ޝަމްނާޒް އަދާކުރެއްވީ ސިޓީ ކައުންސިލްގެ ހެންވޭރު ދެކުނު ދާއިރާގެ ކައުންސިލަރުގެ މަގާމެވެ. އޭނާ މަގާމުން އިސްތިއުފާދެއްވީ ރައީސް މުއިއްޒު ރިޔާސީ އިންތިޚާބު ކާމިޔާބު ކުރެއްވުމާއި ގުޅިގެންނެވެ.
އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރަކަށް އައްޔަން ކުރުމުގެ ކުރިން ޝަމްނާޒް ހުންނެވީ ރައީސްގެ ރަސްމީ ގެކޮޅު، މުލިއާގޭގެ ސްޓޭޓް މިނިސްޓަރުގެ މަގާމުގައެވެ.
