ސޯޝަލް މީޑިއާގައި ދައުރުވަމުންދާ ބަރަހަނާ ފޮޓޯ އަދި ވީޑިއޯއެއްގައި ފެންނަނީ ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ފަލާހް ނޫން ކަމަށާއި މިފަދަ ދޮގު ވާހަކަތައް ފަތުރައިގެން ފިތުނަ އުފައްދާ މީހުންނާ މެދުގައި ފިޔަވަޅު އަޅަން ޖެހޭ ކަމަށް ވެރިކަން ކުރާ ޕީއެންސީ/ޕީޕީއެމުން މިރޭ ބުނެފިއެވެ.
ދެ ޕާޓީ ގުޅިގެން ނެރުނު ބަޔާނެއްގައި ބުނީ ފަލާހްގެ އަބުރަށް އަރައިގަނެ ހަގީގަތާ ހިލާފު ދޮގު ވާހަކަތައް ސޯޝަލް މީޑިއާގައި ފަތުރަމުން ގެންދާތީ އެކަން ހަރުކަށި އިބާރާތުން ކުށްވެރި ކުރާ ކަމަށެވެ. ސޯޝަލް މީޑިއާގައި ފަތުރަމުން ގެންދާ ވީޑިއޯ އަދި ފޮޓޯތަކަކީ ފަލާހް ނޫން ކަން މީގެ ދެ އަހަރު ކުރިން ދިވެހި ފުލުހުންގެ ޚިދުމަތުން ވަނީ ކަށަވަރުކޮށްދީފައި ކަމަށް ވެސް އެ ބަޔާނުގައިވެއެވެ.
"ދެންނެވުނު ފޮޓޯއާއެކު ހަގީގަތާ ހިލާފު ދޮގު ހަބަރު ރޭގެ ވަގުތެއްގައި އެންމެ ފުރަތަމަ ފަތުރާފައިވަނީ ހަގީގަތާ ހިލާފު ދޮގު ވާހަކަތައް ފަތުރާ ފިތުނަ އުފެއްދުމުގައި ހައްދުފަހަނައަޅާފައިވާ ހަސަން ކުރުސީ ނަމުގައި ހަދާފައިވާ ފޭކް އެކްސް އެކައުންޓަކުންކަންވެސް ފާހަގަކުރަމެވެ. އަދި މިނޫންވެސް އިތުރު ފަރާތްތަކުން މި ހަގީގަތާ ހިލާފު ދޮގު ވާހަކަތައް ގެންދަނީ ފަތުރަމުންނެވެ." އެ ބަޔާނުގައިވެއެވެ.
އެހެންކަމުން މިފަދަ ހަގީގަތާ ހިލާފު ދޮގު ވާހަކަތައް ދައްކާ އަދި ފިތުނަ އުފައްދަން މަސައްކަތް ކުރާ ފަރާތްތަކުގެ މައްސަލަ ބަލާ ފިޔަވަޅު އަޅަން ޕީޕީއެމް/ޕީއެންސީން ވަނީ ފުލުހުންނަށް ގޮވާލައިފައެވެ.
