މި އަހަރު ރާއްޖެ އިން ހައްޖުގެ މަތިވެރި އަޅުކަން އަދާކުރުމަށް ދިޔަ ދިވެހިން ހައްޖުގެ އަޅުކަން ފުރިހަމަކޮށްފިއެވެ.
ހައްޖު ކޯޕަރޭޝަންގެ ހަވާލުގައި މި އަހަރު 1،150 މީހުން ހައްޖަށް ދިޔައެވެ. އެކަމަކު، ހައްޖުގެ އަޅުކަން ފެށުމުގެ ކުރިން އެއް ދިވެއްސަކު ވަނީ ނިޔާވެފައެވެ. އެހެންކަމުން މިފަހަރުގެ ހައްޖުގެ އަޅުކަން އަދާކުރީ 1،149 ދިވެހިންނެވެ. އޭގެ ތެރޭގައި ކެންސަރު ބަލި ފަދަ ބޮޑެތި ބަލިތައް ތަހަންމަލު ކުރާ މީހުން ވެސް ހިމެނެއެވެ.
ބައެއް މީހުން ހައްޖުގެ އަޅުކަން އަދާކުރީ އެހެން ބައެއް މީހުންގެ އެހީތެރިކަމާ އެކުގައެވެ. ބައެއް މީހުންނަށް ހޮސްޕިޓަލްގައި ފަރުވާ ދޭން ޖެހޭ ހާލަތަށް ވެސް ދިޔައެވެ. ހައްޖުގެ އަޅުކަން އަދާކުރުމަށް ދިޔަ ދިވެހިންގެ ތެރެއިން ގިނަ މީހުންނަކީ އުމުރުން 50 އަހަރުން މަތީގެ މީހުންނެވެ.
މި މީހުންނަށް ސިއްހީ ގޮތުން މާ ބޮޑެތި މައްސަލަތަކާ ކުރިމަތި ނުވެ، ހައްޖުގެ އަޅުކަން ވަނީ ފުރިހަމަކޮށްފައެވެ.
ރާއްޖެ އިން މި އަހަރު ހައްޖަށް މީހުން ގެންދިއުމުގެ ކަންކަން ނިމުނީ ވަރަށް ކާމިޔާބުކަމާ އެކު ކަމަށާއި އެކަމަކު ރަނގަޅު ކުރަންޖެހޭ ކަންކަން އަދިވެސް އެބަހުރި ކަމަށް އިސްލާމިކް އެފެއާޒް މިނިސްޓަރު ޑރ. މުހައްމަދު ޝަހީމް އަލީ ސައީދު ރޭ ވަނީ ވިދާޅުވެފައެވެ.
"އިންޝާ ﷲ އަންނަ އަހަރަށް އެ ކަންކަން ރަނގަޅު ކުރާނެ،" ޝަހީމް ވިދާޅުވިއެވެ.
މިއީ ރާއްޖޭގެ ހައްޖު ކޯޕަރޭޝަންގެ ތާރީހުގައި ވެސް އެންމެ ގިނަ އަދަދަކަށް ހައްޖަށް މީހުން ގެންދިޔަ ދެ ވަނަ ފަހަރު ކަން ފާހަގަކުރައްވަމުން ޝަހީމް ވިދާޅުވީ، އެތައް މިލިއަން މީހުންގެ ތެރޭގައި ހިނގާ އެހާ ބޮޑު ކަމެއްގައި ކިތަންމެ ބޮޑަށް ކަންކަން ފުރިހަމަ ކުރަން އުޅުނަސް އަމިއްލަ ކޮންޓްރޯލުން ބޭރުން އުނިކަން ހުންނާނެ ކަމަށެވެ.
