އޯގާތެރި މުޖުތަމައުއެއް ބިނާކުރުމަށް މި ސަރުކާރުން ގެންގުޅޭ ސިޔާސަތުގެ ދަށުން ރައްޔިތުންގެ ހާލަތު ދެނެގަނެ ގާތުން ހިދުމަތް ފޯރުކޮށްދިނުމުގެ ގޮތުން އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން "ހާލު ކިހެނެއް؟" ގެ ނަމުގައި ޕްރޮގްރާމެއް އިއްޔެ ފަށައިފިއެވެ.
ރާއްޖޭގެ ހުރިހާ ހިސާބެއްގައި ފެށި މި ޕްރޮގްރާމް ރަސްމީކޮށް ފެށީ ހުޅުމާލެ ދެވަނަ ފިޔަވަހީގެ ހިޔާ ސަރަހައްދުންނެވެ.
އެ ޕްރޮގްރާމްގައި ވަޒީރު ޑރ. އައިޝަތު ޝިހާމް ވެސް ވަނީ ބައިވެރިވެވަޑައިގެންފައެވެ.
ޖެންޑާ މިނިސްޓަރު އައިޝަތު ޝިހާމް ވިދާޅުވީ ދައުލަތުގެ އަޅާލުމާއި އޯގާތެރިކަން އެކި ގޮތްގޮތުން ބޭނުންވާ މީހުން މުޖުތަމައުގައި އެބަތިބިކަމަށެވެ. މި ޕްރޮގްރާމްގެ މަގްސަދަކަށް ވާނީ ރައްޔިތުންގެ ގާތަށް ގޮސް، ހާލު ބަލާ، މުޖުތަމައުގައި ނާޒުކު ފައްތަރެއްގައި ތިބި އާއިލާތަކާ މީހުން ދެނެގަނެ، ދަޢުލަތުން އެމީހުންނަށް ދޭންޖެހޭ އެހީތެރިކަން ފޯރުކޮށްދިނުން ކަމަށް ވެސް އޭނާ ވިދާޅުވިއެވެ.
މިއީ އަމާން އޯގާތެރި މުޖުތަމައުއެއް ބިނާކުރުމަށް ވަރަށް މުހިންމު ޕްރޮގްރާމެއް ކަމަށާއި މި ޕްރޮގްރާމްގެ ތެރެއިން ރާއްޖޭގައި ދިރިއުޅޭ ކޮންމެ އާއިލާއަކަށް ޒިޔާރަތްކޮށް ހާލު ބަލާނެ ކަމަށް އޭނާ ވިދާޅުވިއެވެ.
ޕްރޮގްރާމް ކުރިއަށްގެންދިއުމުގައި، ބޭނުންވާ މަޢުލޫމާތު އެއްކުރަން މުޖުތަމަޢުގެ ފުރިހަމަ އެއްބާރުލުން ދިނުމަށް ވަޒީރު ވަނީ އެދިވަޑައިގެންފައެވެ.
