މީގެ ދިހަ ވަރަކަށް އަހަރު ކުރިން ނ. މާޅެންދޫ، އަހުމަދު މިރުޒާ މަރާލި ކަމުގެ ކުށް ސާބިތުވެ ފުވައްމުލައް ސިޓީގެ އަބްދުالله ނަޒީފް 17 އަހަރަށް ޖަލަށް ލާން މިދިޔަ ބުދަ ދުވަހު ހުކުމް ކޮށްފިއެވެ.
އުމުރުން 25 އަހަރުގެ މިރްޒާއަށް ދަގަނޑު ބުރިން ހަމަލާދީފައިވަނީ 2011 ވަނަ އަހަރުގެ އޭޕްރީލް މަހުގެ 11 ވަނަ ދުވަހު ވިލިމާލޭގައި ހުންނަ ކުޑަކުދިންގެ ޕާކެއްގައެވެ. އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ޑޮކްޓަރުން އޭނާގެ ސިކުނޑި މަރުވެފައިވާ ކަމަށް ކަނޑައެޅި އިރު، އޭގެ ތިން ދުވަސް ފަހުން އޭޕްރީލް މަހުގެ 14 ވަނަ ދުވަހު އޭނާ ވަނީ މަރުވެފަ އެވެ.
މި މައްސަލާގައި ފަސް މީހަކު ހައްޔަރުކޮށްފައިވާއިރު އޭގެ ތެރެއިން ކުޑަކުއްޖަކާއެކު ހަތަރު މީހެއްގެ މައްޗަށް ވަނީ ގަސްދުގައި މީހަކު މެރުމުގެ ދައުވާ އުފުލާފައެވެ. ގަސްތުގައި މީހަކު މެރުމުގެ ދައުވާ އުފުލާފައިވާ ނަޒީފާއި އޭނާއާއެކު ދައުވާ އުފުލާފައިވާ ވިލިމާލޭގެ މުހައްމަދު ޝިފާއުގެ މައްޗަށް މަރުގެ ކުށް ސާބިތުވެ، ކްރިމިނަލް ކޯޓުން މަރުގެ ހުކުމް އިއްވީ 2017 ވަނަ އަހަރުގެ އޭޕްރީލް މަހުގެ ހަތަރު ވަނަ ދުވަހު މިރުޒާގެ ވާރިސުން ގިސާސް ހިފަން ބޭނުން ނުވުމުންނެވެ.
އަދި ތިންވަނައަށް ދައުވާ ލިބޭ ގދ.ގައްދޫގެ އަލީ ރިފްޝާން ވަނީ މިނިވަންކޮށްފައެވެ. އެ މަރާ ގުޅިގެން ދައުވާ އުފުލާފައިވާ ކުޑަކުއްޖާ ޖުވެނައިލް ކޯޓުން ވަނީ 2012 ވަނަ އަހަރުގެ ނޮވެމްބަރު މަހު މިނިވަންކޮށްފަ އެވެ. އެ ހުކުމް ހައިކޯޓުގައި އިސްތިއުނާފު ކުރުމުން އެ ހުކުމް ދަމަހައްޓާފައި ވަނީ 2017 ވަނަ އަހަރުގެ އޮގަސްޓް މަހުގެ 17 ވަނަ ދުވަހު އެވެ.
ނަމަވެސް ސުޕްރީމް ކޯޓުގައި އިސްތިއުނާފުގެ އެންމެ ފަހު މަރުހަލާގައި އާއިލާއިން ވިސްނުން ބަދަލުކޮށް ނަޒީފަށް މައާފު ދޭން ނިންމި އެވެ. ސުޕްރީމް ކޯޓުން ކްރިމިނަލް ކޯޓަށް އަންގާފައިވަނީ އާ އަދަބަކާ މެދު ގޮތެއް ނިންމުމަށެވެ.
މިދިޔަ ބުދަ ދުވަހު ކޯޓުން ވަނީ ނަޒީފް 17 އަހަރާއި ހަ މަހަށް ޖަލަށް ލުމަށް ހުކުމްކޮށްފަ އެވެ. ނަމަވެސް ޖަލުގައި ހުންނަތާ 13 އަހަރަށް ވުރެ ގިނަ ދުވަސް ވެފައިވާއިރު، އޭނާގެ ހުކުމުން މިހާރު ބާކީ އޮތީ ހަތަރު އަހަރާއި ފަސް މަހާއި 14 ދުވަހެވެ.
މިރުޒާގެ ވާރިސުންނަށް މަރުގެދިޔަ ހޯދަން ހުށަހެޅުމުގެ ހައްގު ލިބިގެންވާ ކަން ހުކުމުގައި ފާހަގަކޮށްފައިވެ އެވެ. މިރުޒާގެ އާއިލާއިން ޝިފާއުއަށް މައާފް ކުރީ 17 އަހަރަށް ޖަލަށްލުމަށް ހައި ކޯޓުގައި ކުރި އިސްތިއުނާފް މައްސަލައިގެ އިސްތިއުނާފް މަރުހަލާގަ އެވެ.
ކޮމެންޓު ފޮނުވާ