ވ. ކެޔޮދޫ، ދޭލިޔާގޭ 19 އަހަރުގެ މޫސާ އަހްމަދަށް ޒުވާނަކަށް ވަޅިން ހަމަލާދީ މަރާލި ކަމަށް ތުހުމަތު ކުރެވޭ އިބްރާހިމް ސައްމާހުގެ ބަންދާ ގުޅޭގޮތުން ހައިކޯޓުން ގޮތެއް ކަނޑަނޭޅުމުން އޭނާ ބަންދުން މިނިވަން ވެފައި ވަނިކޮށް އޭނާގެ މައްސަލަައިގެ ޝަރީއަތެއް މިއަދު ހައި ކޯޓުގައި ބާއްވައިފިއެވެ.

މިއަދު ހައިކޯޓުގައި އޮތް ޝަރީއަތުގެ އަޑު އެހުމުގައި، ފަނޑިޔާރުން ދެއްކެވި ވާހަކަފުޅުތަކުގައި ސުޕްރިމް ކޯޓުގެ ދެއަމުރެއްގައި ހުރި ފަރަގުތައް ފާހަގަ ކުރައްވާފައި ވެއެވެ.

އެގޮތުން ފަނޑިޔާރުން ފާހަގަ ކުރެއްވި ގޮތުގައި ސައްމާހުގެ ބަންދާ މެދު ހައިކޯޓުން ގޮތެއް ނިންމަން، ސުޕްރީމް ކޯޓުން ނެރުނު އަމުރުގައި މުއްދަތެއް ނެތް އަމުރެއް ވެސް އެބައޮތް ކަމަށްވެސް ފާހަގަ ކުރައްވާފައި ވެއެވެ.

ސައްމާހުގެ ބަންދާ ގުޅިގެން މި މަހުގެ 9 ވަނަ ދުވަހު ސުޕްރީމް ކޯޓުން ނިންމި ގަޟިއްޔާގެ ހުކުމްގައި ބަޔާން ކޮށްފައި އޮތީ އެދުވަހުން ފެށިގެން 7 ދުވަހުގެ ތެރޭގައި އޭނާގެ ބަންދާމެދު ފަނޑިޔާރުން ގޮތެއް ކަނޑައަޅަންދެން އޭނާ ރިމާންޑް ޖަލެއްގައި ބަންދުކޮށްގައި ބެހެއްޓުމަށެވެ. އެހެންނަމަވެސް މިމަހުގެ 16 ވަނަ ދުވަހު މިމުއްދަތު ހަމަވެގެން ދިޔައިރު ހައިކޯޓުން އޭނާގެ ބަންދާމެދު ގޮތެއް ކަނޑައަޅާފައެއް ނުވެއެވެ.

މިއަދު ޝަރީއަތުގެ މަޖިލިހުގައި ފަނޑިޔާރުން ވިދާޅުވީ، ސުޕްރިމް ކޯޓުގެ ޝަރީއަތް ނިންމިގޮތުގެ ގަޒިއްޔާގައި، 7 ދުވަހުގެ ތެރޭގައި އޭނާގެ ބަންދާމެދު ގޮތެއް ކަނޑައަޅަން ޖެހޭނެ ކަމަށް ބުނެފައިވާއިރު، ހައިކޯޓަށް ލިބުނު ފުރަތަމަ އަމުރުގައި، އެކޯޓުން ގޮތެއް ނިންމަންދެން ސައްމާހުގެ ބަންދުގައި ބަހައްޓަން ޖެހޭކަމަށް ބުނެފައިވާ ކަމަށެވެ.

އަދި ކަރެކްޝަންސްއިން މައުލޫމާތު ސާފުކުރުމުން ހައިކޯޓަށް ލިބުނު 2024/02 ނަންބަރު އަމުރު ކަރެކްޝަންސް އަށް ލިބުނު އިރު އެއަމުރުގައި 7 ދުވަހުގެ މުއްދަތެއް އޮތްކަންވެސް ފަނޑިޔާރުން ފާހަގަ ކުރެއްވިއެވެ. ފަނޑިޔާރު ވިދާޅުވީ ދެ އަމުރަކީވެސް އެއްނަންބަރެއް އޮތް ދެ އަމުރެއް ކަމަށާއި، އެންނަންބަރަކުން ދެ އަމުރެއް ނެރޭނެކަމަށް ގަބޫލު ނުކުރެވޭ ކަމުގައެވެ.

އަޅުގަނޑު މެންނަށް މި ދެލިޔެކިޔުން މިއޮތްގޮތުން ޝަރުއީ ނިޒާމުގެ ލިޔެކިޔުންތަކުގެ ސައްހަ ކަމާމެެދު ހަމަ ސުވާލު އުފެދޭ.

ފަނޑިޔާރު ފާތިމަތު ފަރުހީޒާ ވިދާޅުވިއެވެ.

މިއަދުގެ އަޑުއެހުމުގައި ކަރެކްޝަންސްއިން ޕީޖީއަށް އެކަން ފާހަގަކޮށް އެންގުމުން އެފަރަގު އޮތްކަން ފާހަގަވި ކަމަށެވެ.

މިއަދުގެ އަޑުއެހުމުގައި ފަނޑިޔާރުން ވިދާޅުވީ އެއް އަމުރަކުން 7 ދުވަހުގެ މުއްދަތު ދީފައިވިނަަމަވެސް، ހައިކޯޓުން ގޮތެއް ކަނޑައަޅަންދެން ސައްމާހު ބަންދުގައި ބަހައްޓަން ޖެހޭނެ ކަމަށެވެ. އެހެންނަމަވެސް އެވާހަކަތަކަށް ދައުލަތުގެ ވަކީލުން ޖުމްލަކޮށް އެއްބަސްވެފައެއް ނުވެއެވެ.

2017 ގައި މާފަންނު އައިޓަމްސް ފިހާރަ ކައިރީ މޫސާ އަހުމަދު ގަޔަށް ވަޅި ހަރައި މަރާލި މައްސަލާގައި ދައުވާކޮށްފައިވާ އިބްރާހިމް ސައްމާހު އަހުމަދު ފަތުހީގެ ބަންދާ މެދު ހައި ކޯޓުން ގޮތެއް ނިންމަން ސުޕްރީމް ކޯޓުން ދިން ވަގުތު ހަމަވިއިރުވެސް ގޮތެއް ނުނިންމުމުން ސުޕްރީމް ކޯޓަށް ޕްރޮސެކިއުޓަރ ޖެނެރަލްގެ އޮފީހުން ސިޓީއެއްވެސް ފޮނުވާފައި ވެއެވެ.