މިއަދު ދިރާސީ އާއަހަރު ފެށިގެންދިޔައިރި، މި ދިރާސީ އަހަރު ސެޓްލައިޓް މަހުފޫމަށް 6 ސްކޫލެއްގައި ކިޔަވާދޭނެކަމަށް އެޑިއުކޭޝަން މިނިސްޓްރީން ބުނެފިއެވެ. އެ ސްކޫލުތަކަކީ ފެހެންދޫ ސްކޫލް، ފުޅަދޫ ސްކޫލް، ކޮނޑޭ ސްކޫލް، ރަކީދޫ ސްކޫލް، ވ. ތިނަދޫ ސްކޫލް އަދި އދ. ދިއްދޫ ސްކޫލެވެ.
96،000 އަށްވުރެ ގިނަ ދަރިވަރުންނާއެކު މިއަހަރުގެ ދިރާސީ އަހަރުގެ ކިޔެވުން މިއަދުވަނީ ފަށާފައެވެ. 3 ހަފްތާގެ ޗުއްޓޫއަކަށްފަހު، އާ ދިރާސީ އަހަރުގެ ކިޔެވުން ފެށުމަށް މިއަދު ދަރިވަރުން ސްކޫލްތަކަށް ދާން ފަށާފައިވާއިރު، މިހާރު ރާއްޖެއަށް ކުރަމުންދާ ވިއްސާރައިގެ ސަބަބުން ފުރަތަމަ 3 ދުވަހުގެ ކިޔެވުން 3 ގަޑިއިރަށް ކުރުކުރުމަށް އެޑިއުކޭޝަން މިނިސްޓްރީން ވަނީ ނިންމާފައެވެ.
އަދި އާ ދިރާސީ އަހަރު ފެށިގެންދާއިރު، ދިރާސީ އާ އަހަރަށް ރަށްރަށުން މާލޭ ސްކޫލުތަކަށް ބަދަލުވާން ހުށަހަޅާފައިވާ އަދަދު 1،126 އަށް އަރާ ކަމުގައި އެޑިއުކޭޝަން މިނިސްޓްރީން ބުނެފައި ވެއެވެ. އަދި މާލޭ ސަރަހައްދުގައި އެއް ސްކޫލުން އަނެއް ސްކޫލަށް 1،000 ވަރަކަށް ދަރިވަރުން ބަދަލުވެފައިވާކަމަށްވެސް އެޑިއުކޭޝަން މިނިސްޓްރީން ބުނެފައި ވެއެވެ.
96،000 އަށްވުރެ ގިނަ ދަރިވަރުންނާއެކު މިއަހަރުގެ ދިރާސީ އަހަރުގެ ކިޔެވުން ފެށިގެންދިޔައިރު އޭގެ ތެރޭގައި ހިމެނެނީ 40،300 އަންހެން ދަރިވަރުނާންނާއި 42،700 ފިރިހެން ދަރިވަރުންނެވެ. އަދި ސަރުކާރުގެ 2017 ސްކޫލެއްގައި 83،000 ދަރިވަރުން ތައުލީމު ހާސިލްކުރާއިރު އޭގެ ތެރެއިން 17،000 ދަރިވަރުން ތައުލީމު ހާސިލް ކުރަމުންދާނީ މާލޭ ސިޓީގައެވެ.
ޕްރިވެޓް ނުވަތަ އަމިއްލަ ސުލޫލްތަކުގައި އެލްކޭޖީން ފެށިގެން ގްރޭޑް 12 އާއި ހަމައަށް ތައުލީމު ހާސިލްކުރާ ދަރިވަރުންގެ އަދަދަކީ 13،000 ދަރިވަރުންނެވެ. އޭގެ ތެރެއިން 9،000 ދަރިވަރުން ތައުލީމު ހާސިލް ކުރަމުންދަނީ މާލޭ ސިޓީގައެވެ.
އެޑިއުކޭޝަން މިނިސްޓްރީން ބުނެފައިވަނީ މިއަހަރު މާލޭ ސަރަހައްދުގެ ގްރޭޑް 1 އަށް 2،250 ދަރިވަރުން ވައްދާފައިވާއިރު، މާލޭ ސަރަހައްދުގެ އެހެން ގްރޭޑްތަކަށް 2،081 ކުދިން ވައްދާފައިާކަމަށެވެ.
ރާއްޖޭގެ ސްކޫލްތަކުގައި ކިޔަވައިދިނުމަށް 12،662 މުދައްރިސުން ތިބިއިރު، އޭގެ ތެރެއިން 10،729 މުދައްރިސުންނަކީ ދިވެހިންނެވެ. ބިދޭސީ ޓީޗަރުންގެ އަދަދަކީ 1،933 އެވެ.
އެޑިއުކޭޝަން މިނިސްޓްރީން ބުނެފައިވަނީ، ވިއްސާރައިގެ ގޮންޖެހުންތަކާއެކުވެސް، ކިޔެވުން ފެށުމަށް ބޭނުންވާވަރަށް ސްކޫލްތަކަށް ފޮތް ފޯރުކޮށްދެވިފައިވާ ކަމަށެވެ.
ދިރާސީ އާއަހަރު ފެށިގެންދާއިރު، 162 ސްކޫލެއްގައި އެއް ދަންފަޅިއަށް އަދި 55 ސްކޫލެއްގައި ދެ ދަންފަޅިއަށް ކިޔަވާދެމުން ދާނެއެވެ.
