ވ. ކެޔޮދޫ، ދޭލިޔާގޭ 19 އަހަރުގެ މޫސާ އަހްމަދަށް ޒުވާނަކަށް ވަޅިން ހަމަލާދީ މަރާލި ކަމަށް ތުހުމަތު ކުރެވޭ އިބްރާހިމް ސައްމާހުގެ ބަންދާ ގުޅޭގޮތުން ހައިކޯޓުން ގޮތެއް ކަނޑަނޭޅުމުން އޭނާ ބަންދުން މިނިވަން ވެފައި ވަނިކޮށް އޭނާގެ މައްސަލަ އަލުން ބެލުމަށް ހައި ކޯޓުން މާދަމާއަށް ތާވަލު ކޮށްފިއެވެ.
ސަމާހުގެ މައްޗަށް ދައުލަތުން ދައުވާ ކޮށްފައިވަނީ ތޫނު އެއްޗެއްގެ ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެއްވެ. އެ ދައުވާ ދަށުކޯޓުން ސާބިތުވެފައެއް ނުވެއެވެ. އެހެންނަމަވެސް ދައުލަތުން ވަނީ އެ ދައުވާ ހައި ކޯޓުގައި އިސްތިއުނާފް ކޮށްފައެވެ. ދައުލަތުން ހައުކޯޓުގައި އެދިފައިވަނީ ޝަރީއަތް ނިމެންދެން އެ މައްސަލާގައި އޭނާ ބަންދު ކޮށްދިނުމަށެވެ.
އެހެންނަމަވެސް ހައިކޯޓުންވެސް އޭނާ ބަންދުކުރުމަށް ހައުކޯޓު ހުކުމް ނުކުރި މައްސަލަ ދައުލަތުން ސުޕްރިމްކޯޓުގައި އިސްތިއުނާފް ކުރުމުން އެ ކޯޓުން ހުކުމް ކޮށްފައިވަނީ އޭނާ ހަތްދުވަހަށް ބަންދުކޮށް، އޭނާގެ ބަންދާމެދު ހައި ކޯޓުން ގޮތެއް ނިންމުމަށެވެ.
މިމަހު ސުޕްރިމް ކޯޓުން ކުރި ހުކުމާއެކުވެސް، ހައިކޯޓުން އޭނާގެ ބަންދާމެދު ގޮތެއް ނިންމާފައި ނުވާތީ، ސުޕްރިމް ކޯޓުން ކަނޑައެޅި ބަންދުގެ މުއްދަތުހަމަވެ، އޭނާވަނީ ބަންދުން މިނިވަން ވެފައެވެ.
2017 ގައި މާފަންނު އައިޓަމްސް ފިހާރަ ކައިރީ މޫސާ އަހުމަދު ގަޔަށް ވަޅި ހަރައި މަރާލި މައްސަލާގައި ދައުވާކޮށްފައިވާ އިބްރާހިމް ސައްމާހު އަހުމަދު ފަތުހީގެ ބަންދާ މެދު ހައި ކޯޓުން ގޮތެއް ނިންމަން ސުޕްރީމް ކޯޓުން ދިން ވަގުތު ހަމަވިއިރުވެސް ގޮތެއް ނުނިންމުމުން ސުޕްރީމް ކޯޓަށް ޕްރޮސެކިއުޓަރ ޖެނެރަލްގެ އޮފީހުން ސިޓީއެއްވެސް ފޮނުވާފައި ވެއެވެ.
ސުޕްރީމް ކޯޓުގެ އެންގުމާ އެއްގޮތަށް ހައިކޯޓުގެ ތިން ފަނޑިޔާރުން އަމަލުކޮށްފައި ނުވާ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށަހަޅަން ޕީޖީ އޮފީހުން އަންނަނީ ވިސްނަމުން ކަމަށް އޭރު ޕީޖީ އޮފީހާ ހަވާލާދީ ރިޕޯޓްތައް ބުންޏެވެ. އެހެންނަމަވެސް އެ މައްސަލަ ޖޭއެސްސީއަށް ހުށަހެޅި ކަމެއް ނޭގެއެވެ. މި މައްސަލާގެ ހައި ކޯޓުގެ ބެންޗުގައި ތިއްބަވަނީ ފަނޑިޔާރު ފާތިމަތު ފަރުހީޒާ (ރިޔާސަތު) އާއި ފަނޑިޔާރު މުހައްމަދު ފައިސަލް އަދި ފަނޑިޔާރު އަބްދުއް މާނިއު ހުސެއިންނެވެ.
މޫސާ އަހްމަދުގެ މަރުގެ މައްސަލާގައި ދައުލަތުން 3 މީހެއްގެ މައްޗަށް ހުކުމް ކުރިނަމަވެސް ކުށް ސާބިތުވެފައިވަނީ ސ. ހިތަދޫ, މުޑުދާސްގެ، އަލީ ހަސަންގެ މައްޗަށް އެކަންޏެވެ. އޭނާގެ މައްޗަށް އިއްވާފައިވަނީ 15 އަހަރުގެ ޖަލު ހުކުމެކެވެ.
