ރާއްޖޭގެ ފަތުރުވެރިކަން އިޝްތިހާރުކުރުމަށް ޖަޕާނުގެ ނޫސްވެރިންތަކެއް ރާއްޖެ އައިސްފިއެވެ.
މި ނޫސްވެރިން ރާއްޖެ އައީ ރާއްޖޭގެ ފަތުރުވެރިކަން އިޝްތިހާރު ކުރުމަށްޓަކައި އެމްއެމްޕީއާރުސީން ކުރިއަށް ގެންދާ ފެމިލިއަރައިޒޭޝަން ދަތުރުތަކުގެ ތެރެއިން ދަތުރެއްގައެވެ.
އެމްއެމްޕީއާރުސީން ބުނި ގޮތުގައި ރާއްޖެ އައި ނޫސްވެރިންގެ ތެރޭގައި ހިމެނެނީ "ވޯގް ޖަޕާން އޮންލައިން"، "ސީއާރްއީއޭ ވެބް"، "ނިއުމެރޯ ޓޯކްޔޯޖޭޕީ" އަދި، "މައިނާވީ"ގެ ނޫސްވެރިންނެވެ. އެޓީމު މިމަހުގެ 24 ވަނަ ދުވަހާ ހަމައަށް ރާއްޖޭގައި ތިބޭނެ ކަމަށް އެމްއެމްޕީއާރުސީން ބުންޏެވެ.
މި ދަތުރުގައި އެ ޓީމުގެ މެމްބަރުން ތިބެނީ ކުރަމަތި، ހުވަފެންފުށި، މޫވެންފިކް ރިސޫޓް ކުރެދިވަރު އަދި ލަކްސް ސައުތު އަރީގައެވެ.
މި ދަތުރަށްފަހު މި ޓީމުގެ މެމްބަރުން ރާއްޖެއާ ބެހޭ ތަފާތު އެކި ފޮޓޯ، ވީޑިއޯ އަދި އާޓިކަލްތައް ޝާއިރުކުރުމަށް ވަނީ ހަމަޖެހިފައިވެއެވެ.
އެމްއެމްޕީއާރްސީއިން ބުނީ މި ނޫސްވެރިން ރާއްޖެ ގެނައުމުގެ މައިގަނޑު މަގްސަދަކީ ރާއްޖޭގެ ފަތުރުވެރިކަން ފުޅާވެފައިވާ މިންވަރު ޖަޕާނުގެ މާކެޓުގައި ދައްކުވައި، ރާއްޖެއަށް އަންނަ ޖަޕާނުގެ ފަތުރުވެރިން އިތުރުކުރުން ކަމަށެވެ. ފެމިލިއަރައިޒޭޝަން ޓްރިޕްގައި ދައުވަތު ދިނުމުގައި މަޝްހޫރު، ޒުވާން އަދި ރާއްޖޭގެ ފަތުރުވެރިކަމުގެ ކޮލިޓީ ދައްކުވައިދޭވޭނެ ފަދަ ނޫސްވެރިންނަށް އަމާޒުކޮށްފައިވާ ކަމަށް ވެސް އެމްއެމްޕީއާރުސީން ބުނެފައިވެއެވެ.
މި އަހަރުގެ އޭޕްރީލް މަހުގެ ނިޔަލަށް ޖަޕާނުގެ 9,333 ފަތުރުވެރިން ވަނީ ރާއްޖެއަށް ދަތުރުކޮށްފައެވެ.
