ސައުދީ އަރަބިއްޔާ އިން ރާއްޖެ އަށް ހަދިޔާ ކުރި ކަދުރު އަންނަ ހޯމަ ދުވަހު އައްޑޫ ސިޓީ، ހިތަދޫގައި ބެހުމަށް ހަމަޖެހިއްޖެއެވެ.
އައްޑޫ ސިޓީ ކައުންސިލުން މިއަދު ކުރި އިއުލާނެއްގައި ބުނީ 1445 ވަނަ އަހަރު ސައޫދީ އަރަބިއްޔާގެ ސަރުކާރުން ރާއްޖޭގެ ރައްޔިތުންނަށް ހަދިޔާކުރި ކަދުރުގެ ތެރެއިން ހިތަދޫއަށް ލިބިފައިވާ ކަދުރު، އަންނަ ހޯމަ ދުވަހުން ފެށިގެން ބެހުމަށް ހަމަޖެހިފައިވާ ކަމަށެވެ.
އެގޮތުން ކަދުރު ބެހުމަށް ހަމަޖެހިފައިވަނީ، 1445 ވަނަ އަހަރު ފަގީރުންގެ ދަފްތަރުގައި ހިމެނޭ ކޮންމެ ބޮލަކަށް ދެ ކިލޯ ކަދުރު ދިނުމަށްފަހު މީހުން ދިރިއުޅޭ ގޭބިސީތަކުގެ ތެރެއިން ކަދުރު ބަލައި ހާޒިރުވާ ތަރުތީބުން ކޮންމެ ގޭބިސީއަކަށް އެއް ކިލޯ ކަދުރު ކަމަށް އިއުލާންގައިވެއެވެ.
ފަގީރުންގެ ދަފްތަރުގައި ހިމެނޭ ގޭބިސީތަކަށް ކަދުރު ބެހުން އޮންނާނީ ހޯމަ ދުވަހުން ފެށިގެން އަންނަ ބުރާސްފަތި ދުވަހުގެ ނިޔަލަށް ރަސްމީ ދުވަސްތަކުގެ 9:00 އިން 14:00 އަށެވެ. އަދި މެއި 26 އިން ފެށިގެން ރަސްމީ ދުވަސްތަކުގެ 9:00 އިން 14:00 އަށް ހިތަދޫގައި މީހުން ދިރިއުޅޭ ގޭބިސީތަކަށް ކަދުރު ބަލައި ހާޒިރުވާ ތަރުތީބުން ކަދުރު ހުސްވަން ދެން ބަހާނެ ކަމަށް އިއުލާންގައިވެއެވެ.
ކަދުރާ ހަވާލުވުމަށްދާ މީހެއްގެ އައިޑީ ކާޑާއެކު ހިތަދޫ އަވަށު އޮފީހުގެ ކުރީގެ އިމާރާތަށް އައުމަށް ކައުންސިލުން ވަނީ އެދިފައެވެ.
