ބަނޑޭރި ކޮށީގެ އެޕާޓްމަންޓެއްގެ ތެރޭގައި މަރުވެފައި އޮއްވާ ފެނުނު މީހާއަކީ 25 އަހަރުގެ ޖަލުހުކުމެއް ތަންފީޒު ކުރަމުންދަނިކޮށް، ފާއިތުވިއަހަރު ދޫކޮށްލި މީހެއްކަމަށް މައުލޫމާތު ލިބިއްޖެއެވެ. އެނގިފައިވާ ގޮތުގައި މަރުވެފައި އޮއްވާ ފެނިފައިވަނީ އުމުރުން 30 އަހަރުގެ ހައްމާދު ސައީދުއެވެ. އޭނާއަކީ ގދ. ހޯޑެއްދޫއަށް ނިސްބަތްވާ މީހެކަމަށްވެސް އެނގިފައިވެއެވެ.
"ޚަބަރު އޮންލައިން"އާއި ވާހަކަ ދެއްކި ގދ. ހޯޑެއްދޫގެ މީހަކު ކިޔައިދިން ގޮތުގައި 25 އަހަރުގެ ޖަލުހުކުމެއް ތަންފީޒު ކުރަމުންދަނިކޮށް އޭނާ ދޫކޮށްލާފައިވަނީ ފާއިތުވި އަހަރުއެވެ. އެހެންނަމަވެސް އޭނާ ޖަލުން ދޫކޮށްލި ސަބަބެއް އެނގިފައި ނުވާކަމަށްވެސް މިނޫހާއި މައުލޫމާތު ހިއްސާކުރި ފަރާތުން ބުނެފައި ވެއެވެ.
އޭނާ ކިޔައިދިން ގޮތުގައި، އެނގިފައިވާ ގޮތުގައި ހައްމާދު ދިރިއުޅެމުން ގޮސްފައިވަނީ އޭނާގެ އާއިލާއާއެކުއެވެ.
އެމްއެންޑީއެފްގެ ބަނޑޭރި ކޮށީގެ އެޕާޓްމެންޓެއްގައި މަރުވެފައި އޮއްވައި ފެނުނު މީހާގެ އޮޓްޕްސީ ހެދުމަށް ނިންމާފައިވާ ކަމަށް ފުލުހުން ރޭވަނީ ބުނެފައެވެ. ހައްމާދުގެ ހަށިގަޑު ފެނުނުއިރު އޭނާގެ ހަށިގަޑު އޮތީ ކޮންމެވެސްވަރަކަށް ކުނިވެފައިކަމަށް ވަނީ އެނގިފައެވެވެ.
ފުލުހުން މިއަދު ބުނީ މަރުވެފައިވާ މީހާ ފެނިފައިވަނީ އިއްޔެ 17:44 ހާއިރު ކަމަށެވެ.
"ފުލުހުންނަށް ލިބުނު މައުލޫމާތަކާ ގުޅިގެން ބަނޑޭރި ކޮށި އެޕާޓްމެންޓެއް ބަލައި ފާސްކުރިއިރު ނިޔާވެފައި އޮތް ފިރިހެނަކު ފެނިގެން ސީންގައި ފުލުހުން ދަނީ ހަރަކާތްތެރިވަމުން،" ފުލުހުން ބުންޏެވެ.
ފުލުހުން ބުނީ އެ އެޕާޓްމަންޓަކީ މިވަގުތު ބޭނުންކުރަމުންދާ އެޕާޓްމަންޓެއް ނޫންކަން ޔަގީންކުރެވިފައިވާ ކަމަށެވެ.
ފުލުހުން މިރޭ ބުނީ އެ މަރުގެ މައްސަލައިގެ ތަހުގީގު އިތުރަށް ކުރިއަށް ގެންދިއުމަށްޓަކައި ހަށިގަނޑުގެ އޮޓޮޕްސީ ހަދަން ނިންމައިފައިވާ ކަމަށެވެ.
