ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ލިބިވަޑައިގަންނަވާ މުސާރަ ފާއިތުވި ޖެނުއަރީ މަހުން ފެށިގެން ނުނަންގަވާ ކަމަށް ވިދާޅުވެ ކުރީގެ ރައީސް ނަޝީދު އިތުރުފުޅު ހައްދަވައިފިއެވެ.
ފާއިތުވު ޖެނުއަރީމަހުން ފެށިގެން މަޖިލިސް މުސާރަ ނުނަންގަވާކަމަށް ނަޝީދު ވިދާޅުވީ ސްރީލަންކާގެ "ދަ މޯނިން" ނޫހަށް ދެއްވި އިންޓަވިއުއެއްގަ އެވެ.
މިދިޔަ ހަފުތާގައި އަޅުގަނޑުމެންނަށް އިންތިޚާބެއް އޮތީ. އާ ބެޗުގެ މެމްބަރުން ހުވާ ކުރައްވާނީ އަންނަ ހަފުތާގަ އެވެ. ސީވީއެފްގައި މަސައްކަތް ކުރަން ފެށީ ފެބްރުއަރީ މަހުގެ ތެރޭގަ. ޖެނުއަރީ މަހުން ފެށިގެން އެމްޕީގެ މުސާރަ ނެގުން ހުއްޓާލައިފިން. އާ ދައުރު ފެށެންދެން ޓެކްނިކަލީ އަޅުގަނޑަކީ ގާނޫނު ހަދާ މަޖިލީހުގެ މެންބަރެއް.
އެހެންނަމަވެސް ރައްޔިތުންގެ މަޖިލިހުގެ މެމްބަރެއްގެ ގޮތުގައި ހުންނަވާ، ސިޔާސީ މަސްރަހުން ވަގުތީގޮތުން ދުރަށް ޖެހިވަޑައިގެން، ގާނާއަށް ދިރިއުޅުން ބަދަލު ކުރެއްވިތާ ދެމަސްފަހުން، މަޖިލިހުން ލިބެމުންދާ މުސާރަ ނަޝީދު ދޫކޮށްލައްވާފައިވާކަމަށް ފާއިތުވި އެޕްރިލްމަހުގެ 1 ވަނަ ދުވަހު ވަނީ ވިދާޅުވެފައެވެ.
ނަޝީދު ރައްޔިތުންގެ މަޖިލިހުގެ ރައީސް މުހައްމަދު އަަސްލަމްއަށް އެޑްރެސް ކޮށް ފޮނުއްވި މެސެޖުގައި ލިޔުއްވާފައިވަނީ، ކުލައިމެޓް ވަލްނަރަބުލް ފޯރަމް (ސީވީއެފް)ގެ ފުރަތަމަ ސެކެޓްރީޖެނެރަލްގެ ހައިސިއްޔަތުން ކުރަންޖެހޭ މަސައްކަތްތަކަށް މި މާރިޗްމަހު ގާނާގެ ޕާލަމެންޓުން ސީވީއެފް ސެކެޓްރިއޭޓާއި ބެހޭ ގަރާރު ފާސްކޮށްފައި ވާކަމުގައެވެ. އެހެންކަމުން އެޕްރިލްއިން ފެށިގެން މިދައުރުގެ ބާކީ އޮތް މުއްދަތަށް މަޖިލިހުން ލިބެންޖެހޭ އުނިކޮށްދެއްވުމަށް ނަޝީދު އެދިފައިވެއެވެ.
ނަޝީދުގެ ސިޓީފުޅުގައި ވިދާޅުވީ މިއިން ކޮންމެ ކަމެއްގައި ރަސްމީކޮށް ކަންކަން ހިންގުމަށް ވަރަށް ވަގުތު ނަގާ ކަމަށެވެ.
އެ ގޮތުން މި މަސައްކަތާއި ރަސްމީކޮށް ހަވާލުވުމުގެ ގޮތުން ހަމަޖައްސަންޖެހޭ ކަންކަން ކުރެވި މާޗް މަހުގެ މެދުތެރޭގައި ގާނާގެ ޕާލިމަންޓް އިން ސީވީއެފް ސެކްރެޓޭރިއަޓް އާއި ބެހޭ ގަރާރު ފާސްކޮށްފައިވާ ކަމަށް ސިޓީގައި ވިދާޅުވެފައިވެ އެވެ.
"އެހެންކަމުން އެޕްރީލް 2024 އިން ފެށިގެން މި ދައުރުގައި ބާކީ އޮތް މުއްދަތަށް އަޅުގަނޑަށް ރައްޔިތުންގެ މަޖިލިސްގެ މެމްބަރެއްގެ ހައިސިއްޔަތުން ލިބޭ މުސާރަ އުނިކޮށް ދެއްވުމަށް ދަންނަވަމެވެ." ނަޝީދު ސިޓީފުޅުގައި ވިދާޅުވެފައިވެ އެވެ.
ރައީސް ނަޝީދުގެ ދިރިއުޅުއްވުން ގާނާއަށް ބަދަލުކުރެއްވީ މިއަހަރުގެ ޖެނުއަރީ މަހު އެވެ.
މީގެ އިތުރުން ރައީސް ނަޝީދު ވަނީ ސިޔާސީ މަސައްކަތްތަކުން މި ވަގުތަށް ދުރަށްޖެހިވަޑައިގަންނަވާ ކަމަށް މިދިޔަ އަހަރުގެ ޑިސެމްބަރު މަހު އިއުލާންކުރައްވާފަ އެވެ.
ކޮމެންޓު ފޮނުވާ