އިއްޔެ ބޭއްވި ރައްޔިތުންގެ މަޖިލީހުގެ އިންތިހާބުން ސަރުކާރު ހިންގާ ޕާޓީ، ޕީއެންސީ އަށް ލިބުނު ބޮޑު ކާމިޔާބީ ފާހަގަކުރަން މިރޭ މާލޭގައި ހަވާ އެރުވުމާ އެކު، ހާއްސަ ޖަލްސާއެއް ބާއްވަން ނިންމާފައިވާތީ އާރޓިފިޝަލް ބީޗް ސަރަަހައްދު މިރޭ ވަކި ވަގުތުތަކެއް ބަންދުވާނެކަން ފުލުހުން ހާމަ ކޮށްފިއެވެ.
ފުލުހުން ބުނެފައިވަނީ މިރޭ އާޓިފިޝަލް ބީޗް ސަރަހައްދުގައި ބޭއްވުމަށް ހަމަޖެހިފައިވާ ހަރަކާތަކަށް އެ ސަރަހައްދުގެ ޓްރެފިކް ފްލޯއަށް ގެންނަން ހަމަޖެހިފައިވާ ކަމުގައެވެ. އެގޮތުން މިރޭ 20:00 އިން ފެށިގެން ހަރަކާތް ނިމެންދެން އެ ސަރަހައްދު ބަންދުކުރެވޭނެކަމަށް ފުލުހުން ބުނެފައި ވެއެވެ.
މިރޭ އާޓިފިޝަލް ބީޗް ސަރަހައްދުގައި ބޭއްވުމަށް ހަމަޖެހިފައިވާ ހަރަކާތަކަށް އެ ސަރަހައްދުގެ ޓްރެފިކް ފްލޯއަށް ގެނެވޭ ބަދަލު.
އެގޮތުން މިރޭ 20:00 އިން ފެށިގެން ހަރަކާތް ނިމެންދެން އެ ސަރަހައްދު ބަންދުކުރެވޭނެ. pic.twitter.com/LL5PyC2885
— Maldives Police (@PoliceMv) April 22, 2024
ޕީއެންސީން ބުނެފައިވަނީ 'ދިވެހީންގެ ރާއްޖެ މަޖިލީހަށް – މަރުހަބާ’ގެ ނަމުގައި ދިވެހިންނަށް މަރުހަބާ އާއި ޝުކުރު އަދާކުރުމަށް އެ ޕާޓީން މިރޭ ހާއްސަ ޖަލްސާއެއް ބާއްވާނެ ކަމަށެވެ. ޖަލްސާ ބާއްވާނީ މިރޭ 8:30 ގައި އާޓިފިޝަލް ބީޗުގައެވެ.
އެ ޖަލްސާ އަށް ހުރިހާ ދިވެހިންނަށް ދައުވަތު ދީފައިވާއިރު އެ ހަފުލާއަށް ފަހު ހަވާ އެރުވުން އޮންނާނެ ކަމަށް ޕީއެންސީން ބުންޏެވެ.
ވިހި ވަނަ ރައްޔިތުންގެ މަޖިލީހަށް މެންބަރުން ހޮވުމަށް އިއްޔެ ބޭއްވި އިންތިހާބުގައި ޕީއެންސީން ވަނީ މަޖިލީހުގެ ސުޕަ މެޖޯރިޓީ ހޯދައިފައެވެ. ވަގުތީ ނަތީޖާތައް ދައްކާ ގޮތުގައި ޕީއެންސީގެ ކެންޑިޑޭޓުންނާއި ސަރުކާރަށް ވާގިވެރިވާ ކެންޑިޑޭޓުންނާ އެކު މިހާތަނަށް ސަރުކާރަށް 71 ގޮނޑި ލިބެއެވެ.
ކޮމެންޓު ފޮނުވާ