ހިންނަވަރު ދާއިރާގައި ބޭއްވި ޕީއެންސީގެ މަޖިލިސް ކެމްޕޭން ޖަލްސާއެއްގައި ޅ. ފެލިވަރު މަސް ފެކްޓަރީގައި މަސައްކަތް ކުރާ މުވައްޒަފުންނަށް ވަޒީފާގެ ބިރު ދެއްކުމަށް ގޮވާލި މައްސަލަ އިލެކްޝަންސް ކޮމިޝަނަށް ހުށަހަޅައިފިއެވެ.
އީސީގެ ސެކްރެޓަރީ ޖެނެރަލް އަދި މެންބަރު ހަސަން ޒަކަރިއްޔާ މިއަދު ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ އެ މައްސަލަ އިލެކްޝަންސް ކޮމިޝަނަށް ހުށަހަޅާފައިވަނީ އަމިއްލަ ފަރާތަކުން މިއަދު ކަމުގައެވެ. އަދި އޭނާ ވިދާޅުވީ އެ މައްސަލަ އިލެކްޝަންސް ކޮމިޝަން (އީސީ) އިން ބަލަން ފަށާފައިވާ ކަމުގައެވެ.
އޭނާ ވިދާޅުވެފައިވަނީ އެމައްސަލަ ބެލުމަށްފަހު އިލެކްޝަންސް ކޮމިޝަނުން ފިވަޅު އަޅާނެ ކަމުގައެވެ. އެ މައްސަލަ އީސީން ބެލުމަށްފަހު މައްސަލާއިގެ އެކަށީގެންވާ ހެކި ހުރިނަމަ މައްސަލަ ޕްރޮސެކިއުޓަރ ޖެނެރަލް އޮފީހަށް މަސައްލަ ފޮނުވުމުގެ އިޚްތިޔާރު އީސީއަށް އޮވެއެވެ.
މިހަފްތާގެ ހުކުރު ދުވަހުގެރޭ ޅ. ހިންނަވަރުގައި ބޭއްވި، އެދާއިރާއަށް ވާދަކުރާ ސަރުކާރު ކެނޑިޑޭޓް މުހައްމަދު އަބްދުއްރަހްމާންގެ ކެމްޕޭން ޖަލްސާގައި ވާހަކަ ދެއްކި އަހުމަދު އަބްދުއްރަހުމާން (ހަންޓާ އަހުމަދު) ވަނީ ފެލިވަރުގައި މަސައްކަތްކުރާ އިދިކޮޅު ފަރާތްތަކަށް ސަރުކާރުން ގުޅައިގެން އެއްބާރުލުން ދިނުމަށް އަންގަން ޖެހޭ ކަމަށް ވިދާޅުވެ، އެއްބާރުލުން ނުދީފިނަމަ ފިޔަވަޅު އެޅުމަށްވެސް ގޮވާލާފައެވެ.
އެ ޖަލްސާގައި އޭނާ ވިދާޅުވެފައިވަނީ ވަޒީފާގެ ބިރު ދައްކައިގެން ނޫން ގޮތަކަށް ހިންނަވަރު ދާއިރާގެ ގޮނޑި ކާމިޔާބުކުރަން އުނދަގޫވާނެ ކަމުގައެވެ. އަދި މިނިސްޓަރުގެ އަރިހުން އޭނާ އެދުނީ، ރައީސް ޑރ. މުހައްމަދު މުއިއްޒުއަށް ދަންނަވައިގެން ވިޔަސް ފެލިވަރުގައި މަސައްކަތް ކުރާ މީހުން ކޮންޓްރޯލް ކުރެވޭނެ ބާރެއް ކެންޑިޑޭޓަށް ދިނުމަށެވެ.
އޭނާގެ ވާހަކަތަކާއި ގުޅިގެން ޕީއެންސީން ބުނެފައިވަނީ ސަރުކާރުން ވަޒީފާގެ ބިރު ދައްކަމުންދާ ކަމަށް ބުނެ ދައްކަމުންދަނީ ހަގީގަތާއި ޚިލާފު ވާހަކަތަކެއް ކަމަށެވެ.
ޕީއެންސީން ބުނެފައިވަނީ، ސަރުކާރުން ރައްޔިތުންގެ ތާއީދާއި ލޯބި ހޯދާނީ ރައްޔިތުން އެދޭ ތަރައްގީ ގެނެސްދީގެން، ރައްޔިތުންގެ އަޑުއަހައިގެން ކަމަށާއި އެމްޑީޕީގެ ހަރަކާތްތަކުގައި ސަރުކާރުގެ ވަޒީފާގައި އުޅޭ ފަރާތްތަކުން މިހާރުވެސް ބައިވެރިވާކަމަށެވެ.
ނަމަވެސް އެފަދަ ކަންކަމާއި ގުޅިގެން ފިޔަވަޅު އެޅުމަކީ އެމްޑީޕީގެ ސަރުކާރުން ކުރި ކަމެއްނަމަވެސް، މި ސަރުކާރަކީ އެފަދަ ކަންކަމާއި ގުޅިގެން ފިޔަވަޅު އަޅާނެ ސަރުކާރެއް ނޫންކަމަށްވެސް ޕްރޮގްރެސިވް ކޮންގްރެސް ކޯލިޝަނުން ބުނެފައި ވެއެވެ.
