ސަރުކާރު ކެނޑިޑޭޓުންނަށް ދޭ ވޯޓަކީ ތަރައްގީއަށް ދޭ ވޯޓެއް ކަމުގައި ރައީސް މުއިއްޒު ވިދާޅުވެއްޖެއެވެ.
ސަރުކާރުގެ ކޯލިޝަންގެ ތާއީދާ އެކު، މި މަހުގެ 21 ގައި ބާއްވާ ރައްޔިތުންގެ މަޖިލިހުގެ އިންތިހާބުގައި މާފަންނު އުތުރަށް ވާދަކުރައްވާ އެމްއެންޕީގެ ރައީސް މުހައްމަދު ނާޒިމްގެ ކެމްޕެއިނު ޖަލްސާގައި ރައީސް ވިދާޅުވީ، ސަރުކާރުން އޮތީ ތަރައްގީގެ ދުވެލި އަވަސްކޮށް، ނަތީޖާ ނެރެން ކަމަށާއި އެކަމަކު މިފަދަ މެންބަރުން ހޮވައިފިނަމަ ވަގުތު ބޭކާރުވެގެން ދާނެ ކަން ފާހަގަކުރައްވައި ރައީސް ވިދާޅުވީ އެ ކަންކަން ވާން އޮތީ ސަރުކާރު މެންބަރުން ހޮވައިގެން ކަމަށެވެ.
ތަރައްގީއަށް ބާރު ދުވެލީގައި ތަރައްގީ އަށް ދެއްވާ ވޯޓަކަށް ވާނެ އަޅުގަނޑުމެންގެ ކެންޑިޑޭޓުންނަށް ދެއްވާ ވޯޓު. އެހެންނެއް ނޫން އަޅުގަނޑުމެންނާ ފިކުރު ދިމާ ނުވާ، ޖެއްސުން ކުރާނެ މިހާރު ވެސް އެ ހުރަސް އަޅާ ގޮތަށް ހުރަސް އަޅާ ބަޔަކު ހޮވައިފިއްޔާ އެއްވެސް ގެރެންޓީއެއް ނެތް. އަޅުގަނޑުމެންނަށް ކަންކަން ފާސްކޮށްދިނިއްޔާ ވާނީ.
ރައީސް ވިދާޅުވި އެވެ.
ރައީސް މުއިއްޒު ވިދާޅުވީ ރައްޔިތުން ވޯޓު ދޭނީ ތަރައްގީގެ ފިކުރަށް ކަން ޔަގީން ކުރައްވާ ކަމަށާއި ބޭނުންވަނީ އަމާންކަމާއެކު ގައުމު ގެންގޮސް، ރައްޔިތުން ބޭނުންވާ ނަތީޖާ ދައްކައިދިނުމަށް ކަމަށެވެ.
ތަރައްގީ އަށް ދެއްވާ ވޯޓަކަށް އެ ވޯޓު މި ވަނީ އެ ވޯޓު ދިނީމާ ތަރައްގީގެ ފިކުރު، އަޅުގަނޑުމެންގެ ފިކުރުގައި ތިއްބެވި ނާޒިމް އާއި އަޅުގަނޑުމެންގެ ދެން ތިއްބެވި 92 ކެންޑިޑޭޓުން ހޮއްވެވީމާ އެ ދެވެނީ މުޅި ރާއްޖޭގެ ހުރިހާ ދާއިރާއެއްގެ ތަރައްގީ، އަޅުގަނޑުމެން މި ބޭނުންވާ، ރައްޔިތުން ބޭނުންވާ ހަލުވި ދުވެލީގައި ގެންދިއުމަށްޓަކައި ދެވޭ ވޯޓެއް.
ރައީސް ވިދާޅުވި އެވެ.
މިރޭގެ ޖަލްސާގައި ވާހަކަ ދައްކަވަމުން ރައީސް ވިދާޅިވީ، ފާއިތުވީ ހަތަރު މަހެއްހާ ދުވަހު ފެށިގެން ދިޔައީ ސަރުކާރަށް ދަތިކޮށް، ކަންކަން ލަސްކުރަމުން ދާ ތަން ކަމަށާއި އެ ކަމުގެ އެންމެ ބޮޑު ހެއްކަކީ ތިން ވަޒީރުންނަށް އެއްވެސް ސަބަބެއް ނެތި ރުހުން ނުދިނުން ކަމަށެވެ.
