ހިފްލެޓް ލިސްޓުގައި ހިމެނި، ހިޔާ ފްލެޓް ނުލިބިދިޔަ ފަރާތްތަކަށްމި ސަރުކާރުން އެންމެ ފުރަތަމަ އަޅާ ފްލެޓްތަކުން ފްލެޓް ދޭނެ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ރައީސް އޮފީހުން ކުރިޔަށް ގެންދާ "ރައީސްގެ ޖަވާބު" ސިލްސިލާގެ މިއަދުގެ ސެގްމަންޓުގައި މާލެ ސިޓީ، މމޚ ދަފްތަރު 12152، މުޙައްމަދު ސަލީމް ކުރި ސުވާލަށް ޖަވާބު ދެއްވަމުންނެވެ.
އޭނާ ސުވާލުކޮށްފައިވަނީ ރައީސް ޔާމީންގެ ޒަޢާމަތުގައި ފްލެޓް ދާއިމީ ލިސްޓުގައި ހިމެނި، މިދިޔަ ސަރުކާރުން ފްލެޓް ނުދީ ތިބި ރައްޔިތުންނަށް، މި ސަރުކާރުން ފްލެޓް ލިބޭނެތޯ އެވެ.
އެ ސުވާލުގެ ޖަވާބުގައި ރައީސް މުއިއްޒު ވިދާޅުވީ އެފަރާތްތަކަށް ފްލެޓް ދޭނެކަމުގައި އެމަނިކުފާނު ވައުދުވެވަޑައިގެންނެވި ކަމަށާއި، އެވައުދުއް ފުއްދަވާނެ ކަމުގައެވެ.
މި ސަރުކާރުން އެންމެ ފުރަތަމަ ފަށާ ސޯޝަލް ހައުސިން އިމާރާތްކުރުމުގެ މަޝްރޫޢުގެ ދަށުން އެޅޭ ފްލެޓްތަކުން އެބޭފުޅުންނަށް ހަމަޖައްސަ ދޭނަން. އެއީ ކުރީ ސަރުކާރުން، ރައީސް ޔާމިންގެ ސަރުކާރު ނިމުނު އިރުގަ ދާއިމީ ލިސްޓުގަ ހިމެނުނު ފަރާތްތަ، ރައީސް އިބުރާހިމް މުހައްމަދު ސާލިހުގެ ސަރުކާރުން އޭގެ ތެރެއިން އެތައް ހާސް ބަޔަކު އެއްވެސް ކަހަލަ ހަަމައެއް ނެތި އުނިކޮށްލާފަ ވަނީ. އެހެންވީމަ އެ ފަރާތްތަަކަށް ފްލެޓް ދޭނެކަމަށް އަޅުގަޑުމެން ވާނީ ވައުދުވެފަ. އެވައުދު ފުއްދާނަން ވީހާވެސް އަވަހަކަށް އެޅޭ ފްލެޓްތަކުން.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ މިއަހަރު ފެށޭ އާ މަޝްރޫޢުތަކުގެ ތެރެއިން އެމައްސަލަ ހައްލުވެގެންދާނެ ކަމުގައެވެ.
