މުހިއްމު ވަނީ ހަމައެކަނި ކަންކަން ކޮށްދީ އަދި ނަތީޖާ ނެރެދޭން ކަމުގައި ރައީސް މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ ރޭ ޕީޕީއެމް/ޕީއެންސީގެ އޭދަފުށީ ދާއިރާގެ ކެމްޕެއިން ހަރަކާތެއްގައި ވާހަކަފުޅު ދައްކަވަމުންނެވެ.
މި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ، ރައްޔިތުން މަޖިލީހުގެ މެޖޯރިޓީ ބޭނުންފުޅުވެ ވަޑައިގަންނަވަނީ ކަންކަން ކޮށްދެއްވުމަށް ބޭނުންވެވަޑައިގަންނަވާތީ ކަމަށާއި އެ ނިޔަތުގައި އެ އަޒުމުގައި އަދިވެސް ހުންނެވި ކަަމަށެވެ. ނަމަވެސް ރައްޔިތުން ބޭނުންވާ ނަތީޖާ ނެރެދެއްވޭނީ އެކަމަށް މަޖިލީހުގެ އެއްބާރުލުން ލިބިގެން ކަމަށާއި ސަރުކާރަށް އެއްބާރުލުން ނުދޭ މަޖިލީހެއް އޮވެއްޖެ ނަމަ އެކަން ވެގެން ދާނީ ނަތީޖާ ނެރެދިނުމުގައި މަޑުޖެހުންތައް އައިސްދާނެ ކަމަކަށް ކަމަށް މުއިއްޒު ވިދާޅުވިއެވެ.
އަޅުގަނޑަށް މުހިއްމު ވަނީ ހަމައެކަނި ކަންކަން ކޮށް ދިނުން. ނަތީޖާ ނެރެދިނުން. އެ ނަތީޖާ ނެރެދެވޭނީ އެކަމަށް ބޭނުންވާ އެއްބާރުލުން ރައްޔިތުން މަޖިލިސް ތެރެއިން ލިބިގެން. އެ އެއްބާރުލުން ނުދޭ، ސަރުކާރުގެ މަސައްކަތްތަކަށް ބުރަކި ޖައްސާ، މަޑުޖައްސާ ހުރަސްތައް ކުރާ، މަޖިލީހެއް ކުރިމަތި ކުރުވީމަ ދެން މި ދެންނެވި ނަތީޖާ ނެރުމުގައި އަންނާނެ މަޑުޖެހުމެއް. މީ ވަރަށް ފަސޭހައިން ފަހުމްވެވަޑައިގަންނަވާނެ ވާހަކައެއް.
ރައީސް ވިދާޅުވިއެވެ.
ރޭގެ ޖަލްސާގައި ރައީސް މުއިއްޒު ވަނީ ބ. އޭދަފުށީގަ ވަރަށް އަވަހަށް 1،000 ހައުސިން ޔުނިޓްގެ މަޝްރޫއެއް ވަރަށް އަވަހަށް ފަށާނެ ކަމުގައިވެސް ވިދާޅުވެފައެވެ.
ރޭ ކުރިޔަށްދިޔަ، ޕީއެންސީގެ ޓިކެޓްގައި އޭދަފުށި ދާއިރާއަށް ކުރިމަތިލައްވާ، އެދާއިރާގެ މިހާރުގެވެސް މެމްބަރު ސަލީމްގެ ކެމްޕޭން އިވެންޓުގައި ވާހަކަ ދައްކަވަމުން ރައީސް މުއިއްޒު ވިދާޅުވީ އެކަމަށްޓަކާ ބޭނުންވާ ހުއްދަތައްވެސް ސަރުކާރުން ވަރަށް އަވަހަށް ލިބޭނެގޮތް ހަމަޖައްސަވާ ދެއްވާނޭ ކަމުގައެވެ.
އަދި ރައީސް މުއިއްޒު ވިދާޅުވީ އެ މަސައްކަތް ކުރިޔަށް ދަނީވެސް މެމްބަރު ސަލީމްގެ އިޚްލާސްތެރި މަސައްކަތްތަކުން ކަމަށާއި، އެހެންކަމުން ސަލީމް ކުރައްވާ މަސައްކަތުގަ އެއްބާރުލުން ދެއްވަން ޖެހޭކަމުގައެވެ.
މި މަޝްރޫޢުގެ ސަބަބުން ދާއިރާގެ ގެދޮރުގެ މައްސަލަ އިރާދަކުރެއްވިއްޔާ ހައްލުވާނެ. ބޮޑު ހައްލެއް ލިބިގެންދާނެ.
ރައީސް މުއިއްޒު ވިދާޅުވިއެވެ.
ރައީސް ވިދާޅުވީ ތަރައްގީގެ މިހުރިހާ މަސައްކަތްތަކެއް ކުރިޔަށް ގެންދިއުމަށް ރައްޔިތުންގެ އެއްބާރުލުން ބޭނުންވާ ކަމަށާއި، އެ ވާހަކަ ތަކުރާރުކޮށް ވިދާޅުވަމުން ގެންދަވަނީ ސަރުކާރުން ނަތީޖާ ނެރެދޭން ބޭނުންވާ ކަމުގައެވެ. އަދި އެ ނަތީޖާ ނެރެދެވޭނީ ސަރުކާރަށް އެއްބާރުލުންދޭ މަޖިލީހެއް އޮވެގެން ކަމަށާއި، ބާރު ސްޕީޑުގައި ގެންގޮސް ކަންކަން ނިންމާލެވޭނީ ސަރުކާރަށް މަޖިލިހުގެ މެޖޯރިޓީ ލިބިގެން ކަމުގައެވެ.
އަދި ރައީސް އެދިވަޑައިގަތީ 21 އެޕްރިލްގަ ޖައްސަވާ ފާހަހަކައަކީ ތަރައްގީގެ ފާހަގައަކަށް، އަދި ހަމަޖެހުމުގެ ފާހަގައަކަށް ހައްދަވަން ޖެހޭ ކަމަށެވެ.
