އާލިއާ ބަޓާއި ޝަރުވާރީ ވާގް ހިމަނައިގެން ހަދަން ނިންމާފައިވާ ސްޕައި ޔުނިވާސްގެ އަންހެން ފިލްމުގެ ވިލަން އަކީ ބޮބީ ޑިއޯލް ކަމަށް ރިޕޯޓްތައް ބުނެފި އެެވެ.
މި ފިލްމް އަކީ ޔާޝްރާޖްސް ފިލްމްސް (ވައިއާރްއެފް) ގެ ސްޕައި ޔުނިވާސް ސިސްލިސާ ގެ އަންހެން ބައިކަމުގައި އަންނަނީ ބުނަމުންނެވެ. މި ފިލްމް އިން އާލިއާ ފެނިގެންދާނެ ކަން އިއުލާން ކުރީ މިދިއަ އަހަރުގެ ފަހުކޮޅުގައިއެވެ.
ބޮބީ އަކީ މިދިއަ އަހަރު ރިލީޒް ކުރި އާލިއާ ގެ ފިރިމީހާ އެކްޓަރު ރަންބީރު ކަޕޫރު ގެ ކާމިޔާބު ފިލްމް "އެނިމަލް" ގައި ވިލަން ގެ ގޮތުގައި ފެނިގެން ދިއަ ތަރިއެކެވެ. އަދި މި ރޯލަށް ބޮބީ އަށް ވަނީ ބެލުންތެރިންގެ ތައުރީފް ލިބިގެން ގޮސްފައިއެވެ.
އަދި ރަސްމީކޮށް އަދި އިއުލާން ނުކުރާ މި ފިލްމުގެ ޝޫޓިން މި އަހަރުގެ ފަހުކޮޅު ފަށަން ތާވަލުކޮށްފައިވާ އިރު، ފިލްމުގެ އިތުރު ރޯލުތަކަށް ކާސްޓުން ހަމަޖައްސަމުން އަންނަ ކަމަށް މައުލޫމާތު ލިބެއެވެ.
މި ފިލްމު ވާނީ އާލިއާގެ ފިލްމެއްގައި ބޮބީ މަސައްކަތްކުރާ ފުރަތަމަ ފިލްމް އަށެވެ. އަދި މީގެ އިތުރުން ވައިއާރްއެފްގެ ފިލްމެއް ވެސް މި ދެ ތަރިން ކުޅޭ ފުރަތަމަ ފަހަރަށް ވެގެން ދާނެއެވެ.
ރިޕޯޓްތައް ބުނާ ގޮތުން އާލިއާ އާއި ޝަރުވާރީ ވަރުގަދަ އެކްޝަން ރޯލުތަކުން ފެންނާނެ ފިލްމުގެ ޑައިރެކްޓަރަކީ ޝިވް ރަވައިލް އެވެ.
