ލޯބިވެރިން ކަމަށް ބުނަމުން އަންނަ ޖޯޑު އަނަންނިޔާ ޕާންޑޭ އާއި އަދިއްތިޔާ ރޯއީ ކަޕޫރު އެކުގައި އިޝްތިހާރެއް ކުޅެފިއެވެ.
އެއީ އަނަންޔާ ބްރޭންޑް އެމްބަސެޑަރުކަން ކުރާ އަވިއައިނު އުފައްދާ ބްރޭންޑެއް ކަމަށްވާ ސްކޮޓް އައިވެއާގެ އިޝްތިހާރެކެވެ. މި އިޝްތިހާރާ އެކު އަދިތުޔަ އަކީ ވެސް އެ ބްރޭންޑްގެ އެމްބަސެޑަރަކަށް ވަނީ ހަމަޖައްސައިފަ އެވެ.
އަނަންޔާ ކުރިން މި ބްރޭންޑްގެ އިޝްތިހާރުތައް ކުޅެމުން އައީ ބޮލީވުޑްގެ ޒުވާން އެކްޓަރު ސިދާތު މަލްހޯތުރާއާ އެކުގަ އެވެ. ސިދާތަކީ ވެސް މި ބްރޭންޑްގެ އެމްބަސެޑަރެކެވެ.
މި ދެ ތަރިން ރައްޓެހިވެގެން އުޅޭ ވާހަކަ ދެކެވެން ފެށީ 2022 ގަ އެވެ. އޭގެ ފަހުން އެ ގުޅުން މިހާރު ސިއްރު ނޫންކަމާއި ގުޅުމާ ދޭތެރޭ އެ މީހުން ވަރަށް ސީރިއަސްކަން ގުޅުން ބަދަހިވެފައިވާ މިންވަރުން އެނގެ އެވެ. އެގޮތުން އެކީގައި ހަފުލާތަކުގައި ބައިވެރިވުމާއި ޗުއްޓީތަކަށް އެކީގައި ދިއުން ފަދަ ކަންކަން މިހާރު ވަރަށް އާންމެވެ.
