ރައްޔިތުންގެ މަޖިލިހުގައި މިހާރު ތިބި، ސަރުކާރަށް ނިސްބަތްވާ މެމްބަރުންނަނީ، ދެކޮޅު ނުޖެހޭ، ފިނޑި، އަދި އައިރު ޒިންމާދާރު ބައެއް ކަމުގައި ރައީސް މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވެފައި ވަނީ ޕީއެންސީގެ ޓިކެޓުގައި މާފަންނު ހުޅަނގު ދާއިރާގެ ވާދަކުރައްވާ އަހްމަދު މުސްތަފާ މުހައްމަދުގެ ކެމްޕެއިން ޖަލްސާގައި ރޭ ވާހަކަފުޅު ދައްކަވަމުންނެވެ.
ރޭގެ ކެމްޕޭން އިވެންޓުގައި ވާހަކަ ދައްކަވަމުން ރައީސް ވިދާޅުވީ ސަރުކާރުން މަޖިލިހަށް ހުށަހެޅި ސޮވެރިން ޑިވެލޮޕްމަންޓް ފަންޑުގެ ބިލްވެސް ބޭރުކޮށްލާފައިވަނީ އޮޅުވާލާ މަކަރު ހަދައިގެންކަން، ޕީއެންސީގެ ޕީޖީ ގުރޫޕުން ބޭއްވި ނޫސްވެރިންގެ ބައްދަލުވުމުންވެސް ހާމަވެގެން ގޮސްފައިވާކަމަށެވެ. އަދި އެ މެމްބަރުންނަށް ދެވަނަ ފަހަަރަށް މަޖިލީހުން ފުރުސަތެއް ދިނުމަކީ އަތުން ހެދޭނެ ބޮޑު ގޯހަކަށް މެނުވީ ނުވާނެކަމަށްވެސް ރައީސް މުއިއްޒު ވިދާޅުވިއެވެ.
އިހަށްދުވަހު ސޮވެރިން ޑިވެލޮޕްމަންޓް ފަންޑުގެ ބިލުވެސް ބޭރުކޮށްލީ ހަމަ އޮޅުވާލުމާއި މަކަރު ހެދުމުންކަން އަޅުގަޑުމެން ޕީޖީ ގުރޫޕުން ބޭއްވި އިއްޔެ ބޭއްވެވި ޕްރެސް ކޮންފަރެންސުގަ އެއޮތީ ރައްޔިތުންނަށް ހާމަކޮށްދީފަ. އެހާ ފިނޑި ދެކޮޅުނުޖެހޭ ޢައިރު ޒިންމާދާރު މަސައްކަތްކުރާ ބައެއް މިހާރު މަޖިލިހުގަ އެތިބީ. އެމީހުންނަށް ދެވަނަ ފަހަރަށް ފުރުސަތު ދިނުމަކީ އަޅުގަޑުމެން އަތުން ހެދޭނެ ބޮޑު ގޯހަކަށް ނޫނީ ނުވާނެ.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ އެހެންކަމުން ޒިންމާދާރުވާން ޖެހޭ ކަމަށާއި، އަމިއްލަ ނަފްސަަށް ތެދުވެރިވާން ޖެހޭނެކަމަށެވެ. އަދި މިއަދު ނިންމަންޖެހިފައިވާ އެންމެ މުހިންމު ނިންމުމަކި އަމިއްލަ ނަފްސަށް ތެދުވެރިވުން ކަމުގައި ވިދާޅުވަމުން ރައީސް މުއިއްޒު ވިދާޅުވީ، ހެއްދެވި ފަރާތަށް ބިރުވެރިވެ، މި ރޯދަމަހުން ނިންމޭ އެންމެ މުގައްދަސް ނިންމުމަކަށް ވާނީ ގައުމަށް އިޚްލާސްތެރިވެ ނިންމޭ ނިންމުންކަމުގައެވެ.
