ހުޅުމާލެ ޔޫތު މޫވްމަންޓް (އެޗްވައިއެމް) އިން އިންތިޒާމުކޮށްގެން ބާއްވާ "އެޗްވައިއެމް ރަމަޟާން ޔުނިޓީ ފުޓްސަލް ޗެލެންޖް 1445″ ގެ ސެމީ ފައިނަލަށް އެންމެ ފުރަތަމަ ދަތުރު ކުރި ދެ ޓީމުގެ ތެރޭގައި އެޗްވައިއެމްގެ ދެ ޓީމު ކަމަށްވާ ބުލް ޝާކްސް އާއި ވެޓަރަންސް ހިމެނިއްޖެއެވެ.
ހުޅުމާލެ ރެހެންދި އެއް ނަމްބަރު ފުޓްސަލް ދަނޑުގައި ރޭ ކުޅުނު ދެ މެޗުގެ ތެރެއިން ފުރަތަމަ މެޗުގައި އެޗްވައިއެމް ވެޓަރަންސް ވަނީ 6-3 އިން ޓީމް އެފްއެފް ބަލިކޮށްފައެވެ. ވެޓަރަންސްގެ ލަނޑުތަކުގެ ތެރެއިން ތިން ލަނޑު ޖެހީ އެ ޓީމުގެ ކެޕްޓަން އަދި މޮޅު ކުޅުންތެރިޔާގެ މަގާމު ހޯދި އަބްދުﷲ ޝުޖާއު (ޝުޖާ)އެވެ. އަދި މި މެޗުގައި އިބްރާހިމް ނިޔާޒް (އައްކޮ) ދެ ލަނޑު އަދި ހުސެއިން ސުހައިލް (ކުޑޭ) ވަނީ ލަނޑެއް ޖަހައިފައެވެ.
ޓީމް އެފްއެފްގެ ތިން ލަނޑުގެ ތެރެއިން ބިޝާރު ހަސަން (ބިއްޓު) ދެ ލަނޑު، ހަސަން ފަޔާޒް ލަނޑެއް ޖެހިއެވެ.
މި ނަތީޖާއާ އެކުގައި ގްރޫޕް އޭގެ އެއްވަނައިގައި ކުޅުނު ދެ މެޗުން ލިބުނު ހަ ޕޮއިންޓާއެކުގައި އޮތީ އެޗްވައިއެމް ވެޓަރަންސެވެ. ދެވަނައިގައި އޮތީ ކުޅުނު ތިން މެޗުން ލިބުނު ހަތަރު ޕޮއިންޓާ އެކުގައި ޓީމް އެފްއެފްއެވެ. ތިން ވަނައިގައި އޮތީ ކުޅުނު ދެ މެޗުން ލިބުނު ދެ ޕޮއިންޓާއެކުގައި އެޗްވައިއެމް ޓީމް ވުލްފެވެ. ފުލުގައި އޮތީ މުބާރާތުން ކަޓާފައިވާ ޓްރީ ޓޮޕް ހޮސްޕިޓަލެވެ. އެ ޓީމަށް ލިބިފައި ވަނީ ކުޅުނު ތިން މެޗުން އެންމެ ޕޮއިންޓެކެވެ.
ރޭގެ ދެވަނަ މެޗުގައި އެންމެ ފަހުގެ ޗެމްޕިއަން ބުލް ޝާކްސް ވަނީ 2-1 އިން އެޗްވައިއެމް ބްލެކް ފްލޭޝް ބަލިކޮށްފައެވެ. ބުލް ޝާކްސްގެ ލަނޑުތައް ޖެހީ ހުސެއިން ސިލްމީޒް (ސިއްލެ) އާއި އިސްމާއިލް ރިޔާޒް (ރިޔާ)އެވެ. ބްލެކް ފްލޭޝްގެ ހަމައެކަނި ލަނޑު ޖެހީ މުހައްމަދު ޔާމީނެވެ. މި މެޗުގެ މޮޅު ކުޅުންތެރިޔާގެ މަގާމު ހޯދާފައި ވަނީ ސިއްލެއެވެ.
ގްރޫޕް ބީގައި ކުޅުނު ދެ މެޗުން މޮޅުވެ ހަ ޕޮއިންޓާ އެކުގައި އެއްވަނައިގައި އޮތީ ބުލް ޝާކްސްއެވެ. ދެވަނައިގައި އޮތީ ކުޅުނު ތިން މެޗުން ލިބުނު ހަތަރު ޕޮއިންޓާ އެކުގައި ބްލެކް ފްލޭޝްއެވެ. ތިން ވަނައިގައި އޮތީ ކުޅުނު ތިން މެޗުން ލިބުނު ތިން ޕޮއިންޓާ އެކުގައި މުބާރާތުން ކަޓާފައިވާ ހުޅުމާލެ ހޮސްޕިޓަލެވެ. އަދި ތާވަލްގެ އެންމެ ފަހަތުގައި އޮތީ ކުޅުނު ދެ މެޗުން ލިބުނު އެއް ޕޮއިންޓާ އެކުގައި އެޗްވައިއެމް ފެނޮމިނަލްސްއެވެ.
މި މުބާރާތުގައި މިރޭ ގްރޫޕް ސްޓޭޖްގެ ފަހު މެޗުތައް ކުޅޭނެއެވެ. ފުރަތަމަ މެޗުގައި 22:15 ގައި ބައްދަލު ކުރާނީ ބުލް ޝާކްސް އާއި ފެނޮމިނަލްސްއެވެ. ދެވަނަ މެޗުގައި 23:15 ގައި ބައްދަލު ކުރާނީ ޓީމް ވުލްފާއި ވެޓަރަންސެވެ.
ހުޅުމާލެ ޔޫތު މޫވްމަންޓުން 2017 ވަނަ އަހަރުން ފެށިގެން ކޮންމެ އަހަރަކު ވެސް ފުޓްސަލް މުބާރާތް ބާއްވަމުން އަންނަ އިރު، މުބާރާތް ބޭއްވުމުގެ މަގްސަދުގެ ތެރޭގައި ޖަމިއްޔާގައި ހިމެނޭ މެމްބަރުންނާއި ހުޅުމާލޭގައި ހުންނަ މުއައްސަސާތަކުގެ ގުޅުން ބަދަހި ކުރުން ހިމެނެއެވެ.
އެޗްވައިއެމް ފުޓްސަލް ޗެލެންޖްގެ އޮންލައިން މީޑިއާ ޕާޓްނަރަކީ "ހަބަރު އޮންލައިން" އޮންލައިނެވެ.
