ދިއްދޫގެ ފެނަކައިގައި މަސައްކަތް ކުރަމުން ދިޔަ 57 މުވައްޒަފަކު ވަޒީފާއިން ވަކި ކުރުމަކީ ދިން ވަރަށް ބޮޑު އަނިޔާއެއް ކަމުގައި އެމްޑީޕީގެ ރައީސް އަބިދުﷲ ޝާހިދު ވިދާޅުވެއްޖެއެވެ.
ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުގެ ކެމްޕޭން ދަތުރުގައި، ހއ. ދިއްދޫއަށް ވަޑައިގެން އެރަށުގައި ވާހަކަ ދައްކަވަމުން ޝާހިދު ވިދާޅުވީ ރައީސް ސާލިހުގެ ރަން 5 އަހަރުގައި ބާރު ސްޕީޑުގައި ހިންގަމުން ދިޔަ ތަރައްގީގެ މަޝްރޫޢުތައް ހުއްޓާނުލާނެކަމަށް މި ސަރުކާރުން ވައުދު ވި ކަމަށާއި، އެހެންނަމެސް "މުއިއްޒު ސްޕީޑު"ގައި މިހާރު ކުރިޔަށް ދަނީ ހިއްކާފައިވާ ފަސްގަޑުތައް ކަނޑަށް ފައިބައިގެން ދިއުން ކަމުގައެވެ.
އަދި ޝާހިދު ވިދާޅުވީ ދެން ކުރިޔަށް ދަނީ މުވައްޒަފުންނަށް ބިރު ދެއްކުން ކަމަށާއި، ދިއްދޫގެ 57 މުވައްޒަފަކު، ރޯދަމަސް ކުރިޔަށް އޮއްވާ ކަނޑާލީ ވަރަށް އަނިޔާވެރިކޮށް ކަމަށެވެ.
އެއްވެސް ތަރައްޤީގެ މަޝްރޫއެއް ހުއްޓާނުލާނެ ކަމަށް ވިދާަޅުވެ ވެރިކަމަށް އައިސް، ހއ. ދިއްދޫގެ ހިއްކިބިން މުއިއްޒު ސްޕީޑުގައި ބާރުދުވެލީގައި ކަނޑަށް ފައިބާގެންމިދަނީ، ހަމައެއާއެކު އެއްވެސް ރަހުމެއްނެތި މި ދިއްދޫގެ 57 މީހުން ރޯދަ ނަގާ ބޮޑުކޮއްފައި އޮއްވާ ވަޒީފާއިން ކަނޑާ ދުއްވާލައިފި.
ޝާހިދު ވިދާޅުވިއެވެ.
ފެނަކަ ދިއްދޫ ބްރާންޗުގައި މަސައްކަތް ކުރަމުންދިޔަ ކޮންޓްރެކްޓް ސްޓާފުންތަކެއް ފާއިތުވި ޖެނުއަރީމަހުގެ 17 ވަނަ ދުވަހު ވަޒީފާއިން ވަކިކުރުމާއި ގުޅިގެން އެމުވައްޒަފުން އިހުތިޖާޖުވެސް ކޮށްފައި ވެއެވެ.
އެހެންނަމަވެސް ފެނަކަ އެމްޑީ މުއާޒު ރަޝީދު ކުރެއްވި އެކްސް ޕޯސްޓެއްގައި ވިދާޅުވީ ވަޒީފާއިން ވަކިކުރީ ކޮންޓެރްކްޓް ސްޓާފުން ކަމަށާއި، ކޮންޓްރެކްޓް އާ ނުކޮށްފައިވަނީ އެ ޕްރޮޖެކްޓު ހުއްޓިފައި އޮތުމުން ކަމުގައެވެ.
އެއްވެސް މުވައްޒަފަަކު ވަޒީފާއިން ވަކި ނުކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.
